Туркманистонлик фаоллар 22 сентябрь куни Бирлашган Миллатлар Ташкилотининг Нью-Йорк шаҳридаги бош қароргоҳи олдида норозилик намойишини ўтказди. Мухолифатчилар қўлларида ёзувлар билан Туркманистондаги сиёсий маҳкумларни озод қилишга, пахта майдонларидаги мажбурий меҳнатни тўхтатишга ва Туркманистондаги COVID-19 билан боғлиқ вазиятни ўрганишга чақирди. Бу ҳақда «Turkmen News» хабар берди.
Фаолларнинг баъзилари туркман миллий бош кийимларини кийиб олганди, бошқалари эса қўлларида Туркманистон байроқларини тутиб турганди.
«Нима сабабдан коронавирус авж олаётган мамлакатда ҳукумат болаларни пахта теришга жўнатмоқда, бунинг устига ҳар қандай об-ҳавода?», — дея таъкидлаган намойиш ташкилотчилардан бири бўлган Олга Чориева.
БМТ бош қароргоҳи олдидаги намойишдан кейин фаоллар Нью-Йоркнинг бош майдони —Таймс-скверга борган ва у ерда ҳам Туркманистондаги эркинлик ва демократия учун чиқиш қилган.
«Биз қайта-қайта чиқиш қилиш ниятидамиз, Бирлашган Миллатлар Ташкилотининг биносига борамиз ва Вашингтондаги Туркманистон элчихонасида митинг ўтказамиз, кўчаларда плакатлар билан юрамиз ва одамларга Бердимуҳамедов режими жиноятлари, бой мамлакатдаги қашшоқлик ва очлик ҳақида, қамоқхоналардаги юзлаб сиёсий маҳбуслар ҳақида гапириб берамиз. Биз буларнинг барчасини Туркманистон ҳукумати юзини халққа қаратмагунча қиламиз», — дея ваъда берди фаол Зара Ҳайит.
БМТ Бош Ассамблеяси 22 сентябрь куни видеоалоқа орқали иш бошлади. Туркманистон президенти Гурбангули Бердимуҳамедов йиғилишда қутлов нутқи билан чиқиш қилди. Бердимуҳамедов биринчи марта COVID-19 Туркманистонга таъсир қилмаслигини таъкидламади. У мамлакатда касаллик юқтирганлар борлигини айтмаган, аммо уларнинг йўқлигини ҳам даъво қилмаган. Президент шунчаки COVID-19 бутун дунё учун муҳим муаммо эканлигини таъкидлаган. Шу билан бирга, унинг таъкидлашича, эпидемия экологик жиҳатдан ноқулай минтақалар аҳолиси, масалан, Орол денгизининг қуриб бораётган ҳудуди учун хавфли. Аввалроқ, Туркманистоннинг давлат оммавий ахборот воситалари ниқобларни коронавирус туфайли эмас, балки «Орол денгизидан чиқадиган зарарли чанг» туфайли тақиш кераклиги ҳақида ёзган эди.
Шунингдек, Туркманистон президенти БМТ ва ЖССТга коронавирус геномини ўрганиш бўйича махсус дастур таъсис этишни, «пневмонияга қарши кураш учун махсус кўп томонлама механизм» ишлаб чиқишни ва «Ўткир инфекцияларни даволаш ва олдини олиш бўйича методик марказ» яратишни таклиф қилган.
Бердимуҳаммедов ўз нутқида бошқа бирон бир долзарб муаммоларга тўхталмаган. Туркманистон ҳукумати вакиллари оммавий чиқишларда ҳеч қачон мухолифатнинг баёнотларига муносабат билдирмайди ва мухолифат илгари сурган масалаларни муҳокама қилмайди.
Аввалроқ коронавирус пандемиясига қарамасдан Туркманистонда талабалар пахта теримига жўнатилиши ҳақида хабар берилганди.
Изоҳ (0)