Ўзбекистон Президенти Шавкат Мирзиёев раислигида 24 сентябрь куни ҳудудларда тадбиркорликни ривожлантириш бўйича қўшимча чора-тадбирлар муҳокамаси юзасидан видеоселектор йиғилиши ўтказилди.
Фото: Президент матбуот хизмати
Давлат раҳбарининг таъкидлашича, пандемия даври мамлакатдаги муаммолар ва камчиликларни яққол кўрсатди.
«Қайси туман нимага қодир, қайси туман ва шаҳарлар раҳбарлари ҳозирги ислоҳотларни қандай тушуняпти, деган савол мени жуда безовта қиляпти», — деди Президент.
Шавкат Мирзиёевнинг айтишича, ҳозирги кунда нафақат вилоят ҳокимлари, балки бош вазир ўринбосарлари ҳам бирор масалани кўтаришдан олдин уни туман ҳокимлари билан муҳокама қилмоқда.
Йиғилишда қайд этилишича, Ўзбекистон Президентининг 2020 йил 1 майдаги қарорига асосан, ҳудудларни ижтимоий-иқтисодий ривожлантиришни рейтинг баҳолаш тизими жорий этилган эди. Шунга мувофиқ, биринчи марта туман ва шаҳарлардаги иқтисодий кўрсаткичлар, тадбиркорликни қўллаб-қувватлаш муҳити, инфратузилма ва мавжуд ресурслардан фойдаланиш даражаси ўрганилди. Таҳлиллар асосида улардаги тадбиркорлик ривожи ҳолати «яхши», «ўрта» ва «қониқарсиз» ҳудудларга ажратилди. Хусусан, 48 та туман ва шаҳардаги ҳолат «яхши» (24 фоиз), 119 тасида «ўрта» (60 фоиз) ҳамда 33 тасида «қониқарсиз» (16 фоиз) деб топилган.
«Мана, бизда ‘қониқарсиз’ 33 та туман бор. Уларнинг ҳаммаси ишдан кетиши керак, 4 та сектор раҳбари ҳам кетади. 33 та туманда неча минг аҳоли яшайди, улар ҳозирги сиёсатдан розими? Норози. Бу туманлар имкониятга яраша ишламаяпти.
Тадбиркорлар банкдан қанча маблағ ўтказяпти? Қанча иш жойи яратяпти? Қанча маҳсулот чиқаряпти? Қанча экспорт қиляпти? Бу саволларга жавоб йўқ», — дея таъкидлади давлат раҳбари.
«Одамларимиз турмушини яхшилашга ҳаракат қилмаган раҳбар бир кун ҳам ишлашга ҳаққи йўқ. Ҳозир изланишда бўлган, ўзини қийнаётган ҳокимлар керак менга, ишбилармон керак менга, халқнинг дардини тушунадиган, халқнинг дарди билан яшайдиган раҳбарлар керак менга», — деди Шавкат Мирзиёев.
Маълум қилинишича, Нукус, Балиқчи, Бекобод, Ховос, Бахмал, Мирзачўл, Янгиқўрғон, Шовот, Касби, Қумқўрғон, Учтепа каби туманлардаги аҳвол қониқарсиз.
Қайд этилишича, яхши кўрсаткичларга эришган туман ва шаҳар ҳокимлари ҳамда уларнинг ўринбосарлари маошига 30 фоиз устама тайинланиб, аҳвол қониқарсиз бўлган ҳудудлар раҳбарларига жарима қўлланилади.
