Vazirlar Mahkamasining 17-sentabrdagi farmoyishi bilan 2020-yilning birinchi yarim yilligida sanoat mahsulotlari ishlab chiqarishning o‘sish sur’atlarini ta’minlagani uchun bir qator tuman hokimlari hamda ularning moliya-iqtisodiyot va kambag‘allikni qisqartirish masalalari bo‘yicha birinchi o‘rinbosarlari bir martalik pul mukofoti bilan rag‘batlantirildi. Bu haqda O‘zA xabar berdi.

Foto: “Daryo”

Rahbarlari mukofotlangan tumanlar qatoridan quyidagilar o‘rin olgan:

  • Andijon viloyatining Izboskan va Qo‘rg‘ontepa tumanlari;
  • Buxoro viloyatining Romitan tumani;
  • Namangan viloyatining Norin tumani;
  • Surxondaryo viloyatinnng Muzrabot va Qumqo‘rg‘on tumanlari;
  • Xorazm viloyatining Yangibozor tumani.

Ushbu tumanlar hokimlari 10 million so‘m miqdorida, ularning birinchi o‘rinbosarlari 8 million so‘m miqdorida pul mukofoti oladigan bo‘ldi. Mazkur rag‘batlantirish Vazirlar Mahkamasining zaxira jamg‘armasi mablag‘lari hisobidan amalga oshiriladi.

Shuningdek, mazkur farmoyish bilan 2020-yilning birinchi yarim yilligida sanoat mahsulotlari ishlab chiqarish hajmining o‘tgan yilga nisbatan o‘sish sur’atlari ta’minlanmaganligi uchun ayrim tumanlar hokimlari ogohlantirildi, ularning moliya-iqtisodiyot va kambag‘allikni qisqartirish masalalari bo‘yicha birinchi o‘rinbosarlariga esa hayfsan berildi.

Rahbarlari ogohlantirilgan va hayfsan olgan tumanlar qatoriga quyidagilar kirgan:

  • Buxoro viloyatining Buxoro va Jondor tumanlari;
  • Namangan viloyatining Yangiqo‘rg‘on tumani;
  • Qashqadaryo viloyatining Qarshi tumani;
  • Samarqand viloyatining Bulung‘ur, Samarqand va Jomboy tumanlari;
  • Toshkent viloyatining Chinoz va O‘rta Chirchiq tumanlari;
  • Farg‘ona viloyatining Dang‘ara, Rishton va Yozyovon tumanlari.

2020-yilning yanvar–sentabr oylari yakunlariga ko‘ra, sanoat mahsulotlari ishlab chiqarish ko‘rsatkichlari asosida yuqoridagi ro‘yxatda qayd etilgan tuman hokimlari hamda ularning moliya-iqtisodiyot va kambag‘allikni qisqartirish masalalari bo‘yicha birinchi o‘rinbosarlari faoliyatiga baho berish yoki egallab turgan lavozimidan ozod etishgacha bo‘lgan jazo choralari qo‘llanishi belgilandi.