Россиянинг Ростов вилоятидаги Каменск-Шахтинский шаҳрида Ўзбекистон фуқароси ватанга қайтиш учун поездга чиқиш олдидан аҳволи оғирлашиб, вафот этган. Бу ҳақда Ўзбекистон Ташқи ишлар вазирлиги хабар берди.
Вазирлик томонидан маълум қилинишича, ижтимоий тармоқларда Россиянинг Ростов вилояти Каменск-Шахтинский шаҳридаги палаткали лагерда Ўзбекистон фуқаросининг вафот этгани тўғрисида хабар тарқалган.
Ташқи ишлар вазирлиги Консуллик-ҳуқуқий департаменти хабарига кўра, 2020 йил 19 сентябрь куни Ўзбекистон фуқароларини махсус поездга чиқариш чоғида йўловчилардан бири — 1987 йил 13 сентябрда туғилган Ўзбекистон фуқароси Р.Ж. «Лихая» станцияси олд томонидаги майдонда ўзини ёмон ҳис қила бошлаган ва у тез тиббий ёрдам етиб келгунича вафот этган.
Ўзбекистоннинг Ростов-Дон шаҳридаги Бош консулхонаси берган маълумотга кўра, бу фуқаро палаткали лагерда яшамаган. Санкт-Петербург шаҳридан етиб келгач Р.Ж. соғлиги ёмонлашгани сабабли 14 сентябрь куни Шахти шаҳри Марказий шаҳар шифохонасига ётқизилган ва шу ердан «Лихая» станциясига олиб борилган. Фуқаронинг коронавирус билан касалланганлиги тасдиқланмаган.
Ташкилий ва консуллик-ҳуқуқий масалалар ҳал қилинганидан кейин марҳумнинг жасади чартер рейс орқали Ўзбекистонга юборилган.
Аввалроқ Россиянинг Самара вилоятида Ўзбекистонга қайтиш мақсадида Қозоғистон билан чегара ҳудудида тўпланган ўзбекистонликларни олиб келиш учун 15 та автобусдан иборат илк карвон Россияга жўнаб кетгани ҳақида хабар берилганди.
Эслатиб ўтамиз, 22 сентябрь куни Россиядан 746 нафар ўзбекистонлик поездда ватанга олиб келингани ҳақида хабар берилди. 16 сентябрь куни Самарадан 938 нафар ўзбекистонлик поездда олиб келинди. 15 сентябрь куни эса Самара ва Екатеринбургдан 2 мингга яқин, 3 сентябрь куни 922 нафар ўзбекистонлик поездда Ўзбекистонга олиб келинганди.
Изоҳ (0)