22 сентябрь куни соат 18:30 ларда Навоий вилояти Учқудуқ тумани ҳудудидан ўтувчи А-379 автомобиль йўлида содир бўлган йўл-транспорт ҳодисаси оқибатида икки киши ҳалок бўлди. Бу ҳақда ИИВ ЙҲХББ ахборот хизмати хабар берди.
Маълумотларга кўра, Учқудуқ—Зарафшон йўналиши бўйлаб Lacetti автомобилини бошқариб кетаётган 23 ёшли ҳайдовчи йўлнинг хавфли бурилиш жойида қарама-қарши бўлакка ўтиб кетиб, қаршисидан келаётган Nexia билан тўқнашиб кетган.
Оқибатда Nexia ичида бўлган 57 ёшли йўловчи воқеа жойида, шунингдек, 24 ёшли яна бир йўловчи шифохонага олиб кетилаётган вақтда вафот этган. Nexia’нинг 23 ёшли ҳайдовчиси тан жароҳати олиб шифохонага ётқизилган.
Мазкур ЙТҲ юзасидан Учқудуқ тумани ИИБ ҳузуридаги ТБ томонидан Жиноят кодексининг 266-моддаси 3-қисми «а» банди (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.
Аввалроқ Навоийда рулда ухлаб қолган Damas ҳайдовчиси Ford билан тўқнашув содир этгани, шунингдек, Навоийда содир бўлган ЙТҲда 62 ёшли велосипед ҳайдовчиси ҳалок бўлгани тўғрисида хабар берилганди.
Изоҳ (0)