Тошкент шаҳар Учтепа туманида жойлашган Аtlas савдо мажмуаси биносида коронавирусга чалинган ва гумон қилинган беморларни қабул қилиш ва тақсимлаш маркази ишга туширилди. Бу ҳақда Тошкент шаҳар ҳокимлиги томонидан маълум қилинди.
Учтепа тумани ҳокими ўринбосари Бобур Мирзаев томонидан маълум қилинишича, тақсимлаш маркази саховатпеша тадбиркор томонидан ва ҳомийлик маблағлари ҳисобидан ташкил қилинган.
Тақсимлаш маркази 1000 нафар беморга хизмат қилишга мўлжалланган. Марказнинг биринчи иш кунида 50 нафардан ортиқ бемор қабул қилинган. Бундан ташқари, 10 нафардан ортиқ беморга уй шароитида даволаниш учун зарур тавсиялар ва дори воситалари мазкур марказ томонидан тақдим этилган.
Марказда 750 нафар ходимнинг фаолият юритиши режалаштирилган. Ҳозирги пайтда марказда 72 нафар ходим ишламоқда, уларнинг 60 нафари шифокор ва ҳамширалар бўлса, 10 нафардан ортиғи ёрдамчи кўнгиллилар ҳисобланади.
Эслатиб ўтамиз, Тошкент шаҳридаги «Ўзэкспомарказ»да ташкил қилинган 1000 ўринли тақсимлаш маркази Тошкент шаҳар ҳокимлиги бошқарувида фаолият олиб бормоқда.
Бундан ташқари «Ўзэкспомарказ»нинг 1 ва 2-павильонида ташкил қилинган 814 ўринли госпитални бошқариш Мудофаа вазирлиги зиммасига юкланган. «Ёшлик» спорт мажмуасида ташкил қилинган 520 ўринли тақсимлаш маркази Давлат хавфсизлик хизмати бошқаруви остида фаолият олиб бормоқда. Гимнастика саройида 750 ўринли марказ ишга туширилган ва Ички ишлар вазирлигига бириктирилган.
Изоҳ (0)