Қашқадарё вилоятида мурожаатларга эътиборсиз қараган икки нафар ҳокимга ҳайфсан жазоси қўлланилди. Бу ҳақда вилоят ҳокимлиги ахборот хизмати маълум қилди.
Маълумот берилишича, 2020 йилнинг ўтган даври мобайнида ҳокимликларда жисмоний ва юридик шахсларнинг мурожаатларни кўриб чиқишда раҳбар ва масъул ходимлар томонидан камчилик ва қонунбузарликларга йўл қўйилгани аниқланган.
Ўрганиш натижаларига кўра, вилоятдаги мавжуд туман ва шаҳар ҳокимликларнинг 32 нафар масъул ходимига ҳайфсан берилган бўлиб, уларнинг орасида икки нафар туман ҳокими ҳам бор. Бироқ вилоят ҳокимлиги ҳайфсан олган ҳокимлар айнан қайси ҳокимлар эканлигини очиқламаган.
Эслатиб ўтамиз, ҳукуматнинг 2020 йил 17 сентябрдаги фармойиши билан 2020 йилнинг биринчи ярим йиллигида саноат маҳсулотлари ишлаб чиқаришнинг ўсиш суръатларини таъминлагани учун қатор ҳокимлар ва уларнинг молия-иқтисодиёт ва камбағалликни қисқартириш масалалари бўйича биринчи ўринбосарлари бир марталик пул мукофотлари билан рағбатлантирилганди. Шунингдек, мазкур фармойиш билан бир нечта туманлар ҳокими огоҳлантирилди, уларнинг молия-иқтисодиёт ва камбағалликни қисқартириш масалалари бўйича биринчи ўринбосарларига эса ҳайфсан берилди. Булар қаторида Қашқадарё вилоятининг Қарши тумани ҳокими ва унинг биринчи ўринбосари ҳам бор.
Қўшимча қилинишича, Қашқадарё вилояти ҳокимлигига 2020 йил январь ойидан буён Ўзбекистон Республикаси Президентининг Халқ қабулхоналари орқали 145 та, Виртуал қабулхона орқали 731 та, сайёр қабул ва учрашувларда эса 6798 та мурожаат келиб тушган. Ҳокимлик мурожаатларнинг нечтаси ечим топганига ойдинлик киритмаган.
Изоҳ (0)