Россиялик сиёсатчи Алексей Навальнийга Берлиндаги «Шарите» клиникасидан жавоб берилди. Бу ҳақда клиниканинг расмий сайтига таяниб, Meduza хабар берди.
«Беморнинг аҳволи шу қадар яхшиландики, унга стационардан жавоб берилган. Алексей Навальний ‘Шарите’да 32 кун даволанди, уларнинг 24 кунида у реанимацияда ётди. Беморнинг ҳозирги аҳволидан келиб чиқиб, даволовчи шифокорлар у тўлиқ соғайдан деб ҳисобламоқда. Бироқ оғир заҳарланишнинг узоқ муддатли потенциал оқибатларини баҳолашга ҳали жуда эрта», — дейилади клиника баёнотида.
Эслатиб ўтамиз, Алексей Навальнийнинг аҳволи 20 август куни Томскдан Москвага учаётган самолётда ёмонлашган ва у комага тушган. Комадаги дастлабки икки кунни сиёсатчи Россиянинг Омск шаҳридаги клиникада ўтказган, шундан сўнг у Берлинга олиб кетилган. «Шарите» клиникаси шифокорлари Навальний етиб келганидан кейин икки кун ўтиб унинг холинестераза ингибиторлари гуруҳидан бўлган модда билан заҳарланганини маълум қилган.
Мавзуга доир: Навальний заҳарни ўзи қабул қилган бўлиши мумкинлиги тўғрисидаги Путиннинг тахминига жавоб қайтарди
Германия Навальнийнинг заҳарланишига оид маълумотларни Кимёвий қуролни тақиқлаш ташкилотига юборган. Россия ҳукумати дастлаб Омскдаги касалхонада сиёсатчидан олинган тестлар организмда заҳар борлигини кўрсатмаганини таъкидлаганди.
Изоҳ (0)