Александр Лукашенко расман Беларусь президенти лавозимида иш бошлади. Бу ҳақда «Belta» агентлигига таяниб, Meduza нашри хабар берди.
Инаугурация маросими Минскдаги Мустақиллик саройида бошланган. Унда бир неча юз киши иштирок этмоқда. Улар орасида юқори мартабали амалдорлар, парламент аъзолари, давлат ташкилотлари раҳбарлари ва ОАВ, илм-фан, маданият ва спорт вакиллари ҳам бор.
Лукашенко ўнг қўлини конституцияга қўйган ҳолда беларус тилида қасамёд келтирган. Шундан сўнг, у қасамёд қабул қилингани тўғрисидаги актни имзолаган ва Марказий сайлов комиссияси раиси Лидия Ермошинадан Беларусь президенти гувоҳномасини қабул қилиб олган.
Инаугурация маросими республика телеканаллари орқали трансляция қилинмаяпти (қонун бўйича трансляция амалга оширилиши керак). Маросим ҳақида олдиндан ҳеч нима дейилмаган, тайёргаликлар эълон қилинмаган. Аввалроқ Telegram’даги Nexta канали Лукашенко норозилик намойишлари фонида инаугурацияни яширинча ўтказиши мумкинлиги ҳақида ёзган.
Мавзуга доир:
Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди. Шундан буён мамлакатда норозилик намойишлари ва намойишчиларни қўллаб-қувватлаш учун чиқишлар давом этмоқда.
Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,08 фоиз овоз тўплаган. Мухолифат номзоди Светлана Тихановская эса расмий маълумотларга кўра, 10,09 фоиз овоз олган.
Натижалар эълон қилингач, Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
Изоҳ (0)