Германия Александр Лукашенкони инаугурациядан кейин ҳам Беларуснинг қонуний президенти деб ҳисобламайди. Бу ҳақда Deutsche Welle’га таяниб, Meduza хабар бермоқда.
Шунингдек, Словакия ҳам Лукашенконинг қонунийлигини тан олишдан бош тортди. Бу ҳақда мамлакат ташқи ишлар вазири Иван Корчок Twitter’да маълум қилди.
Литва президенти Гитанас Науседа ҳам шундай баёнот билан чиқди. «Беларусда президентлик сайловлари на эркин, на адолатли ўтди. Уларнинг натижаси ноқонуний. Ҳеч қандай маросим — у дабдабали бўладими ёки сирли — бу рад этиб бўлмайдиган ҳақиқатни ўзгартирмайди», — деган у.
Латвия ташқи ишлар вазири Эдгарс Ринкевичс Лукашенконинг махфий инаугурацияси уни мамлакатнинг қонуний президентига айлантира олмаслигини эълон қилди. Шунингдек, Лукашенко «ўз мандатидан ақниқ айрилгани» ҳақида Эстония ташқи ишлар вазири Урмас Рейнсалу ҳам айтди.
23- сентябрь куни эрталаб Минскдаги Мустақиллик саройида аввалдан эълон қилинмаган инаугурация маросими бўлиб ўтди. Унда Александр Лукашенко Беларусь президенти лавозимини эгаллади. Унда юқори мартабали амалдорлар, парламент аъзолари, давлат ташкилотлари раҳбарлари ва ОАВ, илм-фан, маданият ва спорт вакилларидан иборат бир неча юз киши иштирок этган. Инаугурация маросимидаги лавҳа Беларусь телеканаллари эфирида постфактум намойиш этилган.
Мавзуга доир: Александр Лукашенко расман Беларусь президенти лавозимида иш бошлади. Унинг инаугурацияси «яширинча» ўтказилган
Изоҳ (0)