Англияда COVID-19 билан кураш бўйича чеклов чоралари, жумладан, бар ва ресторанлар учун иш соатлари чеклови, шунингдек, бирга йиғилиши мумкин бўлган кишилар сони бўйича чекловлар қайта жорий қилинади. Бу ҳақда Буюк Британия бош вазири Борис Жонсон маълум қилди, деб ёзмоқда «Интерфакс».
«Ҳукумат Англияда коронавирус инфекциясининг максимал даражада пасайишига эришиш учун ҳаётимиз ва яшаш шароитимизга минимал даражада зарар етказадиган, диққат билан кўриб чиқилган янги чекловларни ўрнатади», — деди Жонсон.
Унинг сўзларига кўра, мамлакатда иккинчи миллий карантин жорий қилинмаяпти, ҳамма уйда ўтиришга мажбур эмас, мактаблар ва университетлар фаолиятни тўхтатмайди. «Биринчидан, биз уйда ишлашга қодир бўлган барча офис ишчиларидан буни сўраймиз», — деди Жонсон Буюк Британия парламентидаги чиқишида.
Шунингдек, 24 сентябрдан бошлаб барча барлар ва ресторанлар фақат столларда хизмат кўрсатиши керак бўлади, олиб кетиш хизматлари бундан мустасно. Унинг таъкидлашича, барча муассасалар маҳаллий вақт билан соат 22:00 да ёпилиши керак.
Бундан ташқари, ҳукумат ҳимоя ниқобларини тақиш талабларини ҳам кенгайтирмоқда, хусусан, энди бу чора чакана савдо дўконлари ишчилари, барча таксилар ва шахсий транспорт воситаларидан фойдаланувчиларга тааллуқли бўлади. Шу билан бирга, бар ва ресторанларда меҳмонлар ва ходимлардан столлар атрофига ўтирмаган вақтда ниқоблардан фойдаланиш талаб қилинади.
Бош вазирнинг сўзларига кўра, 28 сентябрь кунидан бошлаб тўйларда рухсат этилган меҳмонлар сони 15 кишидан ошмаслиги керак, дафн маросимларида 30 кишигача рухсат берилади.
Жонсоннинг таъкидлашича, туризм ва савдо соҳаларида коронавирусга қарши чоралар бўйича тавсиялар қонуний мажбуриятларга айланади, агар улар бузилса, жарима солинади.
Ушбу қоидаларни бузганлик учун қаттиқроқ жазо чоралари қўлланилади. Шундай қилиб, ўзини ўзи яккалаши керак бўлганлар, аммо бу ишни қилмаганлар учун 10 минг фунт стерлинггача жарима белгиланади. Худди шу жазо қоидаларни бузган корхоналарга нисбатан ҳам қўлланилади.
Мажбурий ниқоб тақиш қоидасини бузиш биринчи қоидабузарлик учун 200 фунт стерлинггача жаримага сабаб бўлади. Жонсоннинг айтишича, тартибни сақлаш учун полициячилар кўчаларга кўпроқ жойлаштирилади
Бош вазирнинг қўшимча қилишича, юқоридаги чоралар Англияга тегишли. Мамлакатнинг бошқа минтақалари ҳокимиятлари ҳам COVID-19 тарқалишининг олдини олиш учун шунга ўхшаш чоралар кўради.
Буюк Британия бош шифокори Крис Уитти Лондон инфекциянинг тез тарқалиши сабабли яқин олти ой ичида COVID-19 эпидемияси билан жиддий кураш олиб бориши керак, деб ҳисоблайди.
Уиттининг сўзларига кўра, мамлакат йўналишни ўзгартириши керак, акс ҳолда аҳоли оғир аҳволга тушиб қолади.
Ўз навбатида, ҳукуматнинг илмий маслаҳатчиси Патрик Велленснинг айтишича, бир неча ҳафта ичида Буюк Британияда ҳеч қандай чоралар кўрилмаса, касалланишнинг ўртача кунлик ўсиши 49 мингга етиши мумкин. Ўлим ҳолатларининг кунлик кўрсаткичи эса ноябрь ойининг ўрталарига келиб 200 дан ошиши мумкин.
Сўнгги маълумотларга кўра, Буюк Британияда коронавирусга чалинганларнинг умумий сони 398 мингдан ошган, касалланганларнинг 41,7 мингдан ортиғи вафот этган.
Аввалроқ Борис Жонсон Буюк Британияда қайта карантин жорий этилиши мумкинлигини маълум қилганди.
Изоҳ (0)