Ижтимоий тармоқларда тарқалган Чирчиқ дарёси устига қурилган кўприк яроқсиз ҳолга келаётгани тасвирланган видео юзасидан ҳолат воқеа жойига бориб, мутахассислар иштирокида ўрганилди. Бу ҳақда «Ўзбекистон 24» телеканали орқали маълум қилинди.
Видеода Қибрай туманидан Бўстонлиқ туманига элтувчи кўприк устунлари остини сув ювиб кетгани тасвирланган.
Таъкидланишича, «Чирчиқ болта» кўприги лойиҳа асосида, 21 метр чуқурликда, тепа қисми 1,4 фундамент қилиниб, устига 7 метрли саккизта устун қоқилган. Қурилиш жараёнида ҳеч қандай хатоликка йўл қўйилмаган.
«Охири хусусий тадбиркорлик субъектлари, шағал қазиб олиш [дарёдан] корхоналарига бориб тақалмоқда. Бу ҳақда тегишли ташкилотларга хабар бердик, агар шу тариқа қазиш ишлари давом эттирилса, кўприкнинг хавфсизлигига салбий таъсир кўрсатади», — дейди мутахассис.
Маълум қилинишича, лойиҳага биноан таянч устунлари сув таъсирига учраши мумкин, бунда меъёр 3-5 метр чуқурликни ташкил этади. Ҳозирда унинг қарийб 1 метрини сув ювган. Мутахассисларнинг сўзларига кўра, кўприк устунларининг сув ювиб кетишига сабаб — кўприкнинг ўн ва чап томонларида хусусий шағал қазиб олиш ишлари олиб борилиши.
«Мазкур тадбиркорлик субъектлари тўғрисида Тошкент вилояти прокуратурасига маълумот берилган. Ҳудуд иккита корхонага берилган. Корхоналар фаолият турида ўша ҳудудда жойлашган корхоналар учун экологик-экспертиза хулосасида белгиланган талаблари бор. Бу талабларнинг биринчиси — қазиб олинган қум-шағал воситаларидан кейинги ҳолатда сувни ювиб кетмаслик учун дамбаларни шакллантириш вазифаси юклатилган. Бу вазифани иккала корхона ҳам бажармаганлиги ҳисобига кўприкнинг айрим қисмларида сув ўзанининг ўзгариши ҳисобига ювилиш оқибати юзага келган. Давлат аҳамиятига эга кўприкларнинг 2,5 километр атрофида фаолият олиб бормаслик тўғрисида огоҳлантириш хатлари берилган», — дейди Экология давлат қўмитаси бошқарма бошлиғи Собир Машрабов.
Изоҳ (0)