Ichki ishlar vazirining o‘g‘li Boboxon Bobojonov “Qishloq qurilish bank” boshqaruv raisi o‘rinbosari etib tayinlandi

ATB “Qishloq qurilish bank” Kuzatuv kengashining tegishli qaroriga asosan bank boshqaruvi raisiga yangi o‘rinbosarlar tayinlandi. Bu haqda bank axborot xizmati xabar berdi.

Unga ko‘ra, Boboxon Bobojonov ATB “Qishloq qurilish bank” boshqaruvi raisi o‘rinbosari etib tayinlandi.

Boboxon Bobojonov bunga qadar O‘zbekiston Markaziy banki va ATB “Qishloq qurilish bank” tizimida turli lavozimlarda hamda Toshkent davlat yuridik universitetining moliya-iqtisod ishlari bo‘yicha prorektori vazifasida faoliyat yuritgan.

“Xabar.uz” nashrining yozishicha, Boboxon Bobojonov O‘zbekiston ichki ishlar vaziri general-leytenant Po‘lat Bobojonovning o‘g‘li.

Shuningdek, Sanjar Olimjonov ATB “Qishloq qurilish bank” boshqaruvi raisi o‘rinbosari etib tayinlandi.

Sanjar Olimjonov shu kunga qadar AITB “Ipak yo‘li” G‘aznachilik boshqarmasi boshlig‘i lavozimida ishlab kelayotgan edi.