Тошкент шаҳри ҳокимлиги ҳузуридаги Жамоатчилик кенгаши экспертлари шаҳардаги қурилиш соҳасига оид вазиятни таҳлил қилиб, ўзининг таклиф ва мулоҳазаларини тақдим этди.
«Ушбу соҳа узоқ вақт давомида тўхтаб қолганини ҳисобга олсак, фикримизча, қурилишнинг замонавий даражаси талаблари ва меъморлар, муҳандислар ва қурувчилар томонидан уларга риоя этилиши ўртасида номувофиқлик пайдо бўлди. Кўплаб ҳолатларда қурилиш компаниялари амалдаги қонунчиликда белгиланган қурилиш ва ижтимоий нормаларга амал қилмаяпти», — дейилади Жамоатчилик кенгаши хатида.
Экспертлар объектлар қурилишидаги қонунбузарликлардан хавотирда эканликларини таъкидлаган. Қайд этилишича, қурилиш жараёнида кўпинча ижтимоий объектлар, яшил майдонлар, тўхташ жойлари ва бошқа инфратузилмавий ҳамда ижтимоий омилларни таъминлаш ҳисобга олинмаяпти.
«Бундан ташқари, деярли барча ҳолатларда қурилиш вақтида алоҳида эҳтиёжманд инсонлар, кексалар ва болалар аравачаси бор оналар учун шароитлар яратилмаган, шунингдек, сайр қилиш жойлари йўқ», — дея таъкидланади хатда.
Экспертларнинг фикрича, бу каби вазият кўплаб учрамоқда, чунки қурилиш ишлари Тошкентни ривожлантиришнинг бош режаси томонидан тасдиқланмасдан амалга ошириляпти.
«Аммо бош режасиз ҳам биноларни ихчамлаштириш масаласини турли можароларсиз, мавжуд меъёрларга риоя қилган ҳолда ҳал этиш мумкин», — қайд этади Жамоатчилик кенгаши.
Экспертлар пойтахтдаги қурилиш ишларида қатор тизимли камчиликларни қайд этган:
- алоҳида эҳтиёжга эга инсонлар, болалар аравачаси бор оналар учун шароитларнинг йўқлиги;
- ер участкаларини танлаш ва ажратиш тизими (мавжуд биноларни зичлаштириш);
- мавжуд магистрал ва даҳалараро йўллар атрофида қурилишлар;
- қурилиш ишларининг сифати.
Мактуб якунида экспертлар Тошкентда амалга оширилаётган барча қурилиш ишлари устидан таҳлил ўтказишга, қурилиш ва архитектура талабларини бузаётган объектларнинг қурилишини тўхтатишга чақирган.
Эслатиб ўтамиз, пойтахт ҳокимлиги ҳузуридаги Жамоатчилик кенгаши 2018 йилда ўз ишини бошлаган ва унга тадбиркор Ҳикмат Абдураҳмонов раислик қилганди. 2019 йилнинг июль ойида у раис сифатида ишини якунлагани, бироқ кенгаш таркибида қолишни режалаштираётгани ҳақида маълум қилганди.
Изоҳ (0)