Gangnam Style, Mr.Saxobeat сингари қўшиқлари бир кунда хит бўлган ижрочилар ҳозир нима билан банд? (видео)

Машҳур бўлиш осон эмас, машҳурликни сақлаб қолиш эса ундан-да қийин. Қуйида биргина хити билан машҳур бўлган, аммо шундан кейин кўринмай қолган шоу-бизнес вакиллари ҳақида маълумот бериб ўтамиз.

Пьер Нарцисс

«Шоколадли қуён» («Шоколадний заяц») қўшиғи билан яхши таниш бўлган Пьер кейинчалик ҳам ижод билан шуғулланишига қарамай, омадли карьера қилишга муваффақ бўлмаган. У баъзида қўшиқлар тақдим қилади, клуб ва оқшом тадбирларида дижей сифатида ҳам фаолият олиб боради. Бир вақтлар қўшиғи хит бўлган Нарцисс шов-шувли жанжалларга ҳам аралашган.

2017 йилда хонандага бир неча аёллар томонидан айбловлар қўйилган, хусусан, рафиқаси Валерия Калачева эрини спиртли ичимликлар ичиш ва қўл кўтаришда айблаган. Оқибатда Пьер рафиқаси билан ажрашган.

Маша Ржевская

«Юлдузлар фабрикаси–2» нинг яна бир иштирокчиси Маша Ржевскаянинг ҳам «Мушук бўлсам» («Когда я стану кошкой») қўшиғи хит бўлган.

Бир вақтлар радиоканаллардан тушмаган қўшиқ ижрочиси кейинчалик эстрадада ўз ўрнини топа олмаган ва актрисалик билан шуғулланишга қарор қилган. Унга америкалик кинорежиссёрлар томонидан таклифлар ҳам келиб тушган ва у Мария Кая тахаллуси билан қисқа метражи фильмларда суратга тушган. Айни вақтда Маша Лондонда яшайди ва театрда ишлайди. У турмуш қурган ва бир қизи бор.

Александра Стан

Руминиялик хонанда Александра Станнинг Mr. Saxobeat қўшиғи дунёнинг барча бурчагида машҳурликка эришган десак, хато бўлмайди. Аммо хит қўшиқ ва унинг ижрочиси вақтлар ўтиб унутилган.

Шунга қарамасдан, Александра мусиқа билан шуғулланишда давом этади, альбомлар чиқаради ва Европа ҳамда АҚШ бўйлаб тур сафарларга бориб туради. 2013 йилда хонанда саломатлиги сабаб карьерасида бироз танаффус кузатилган, аммо ҳозир ижод қилишда давом этмоқда ва яқинда янги альбомини тақдим этди.

Никита Малинин

«Юлдузлар фабрикаси–3» ғолиби бўлган Никита «Мушукча» («Котёнок») қўшиғи сабаб машҳурликка эришганди. Шундан кейин унинг бошқа ижод намуналари аввалгисидек хит бўлмаган, аммо Малинин хонандалик карьерасини тўхтатгани йўқ.

У нафақат ўзи, балки бошқа шоу-бизнес вакиллари учун ҳам қўшиқ ёзиб, мусиқа басталаб туради. Хонанда турмуш қурган, уни онда-сонда саҳнада учратиш мумкин.

Las Ketchup

Испаниялик уч опа сингил — Las Ketchup гуруҳи аъзолари аслида шоу-бизнесга бегона бўлган. Ҳазил тарзида Aseraje қўшиғини ёзишга қарор қилган опа-сингиллар қўшиқдан кейин бир онда машҳур бўлиб кетган. Деярли барча мамлакат хит-парадларида уларнинг қўшиғи бир неча ҳафта давомида етакчи бўлган.

Кейинчалик улар томонидан Hijas del Tomate деб номланган дебют альбоми тақдим қилинган ва бир қанча нуфузли мукофотларга сазовор бўлишларига сабабчи бўлган. Айни вақтда Las Ketchup мусиқа ёзиш ва Европа бўйлаб гастрол сафар қилишда давом этмоқда. Гуруҳ чиқиши давомида эски рэпертуаридаги қўшиқларни ижро қилишни яхши кўради.

Елена Терлеева

Елена «Қуёш» қўшиғи ижросидан кейин «Олтин граммафон»га сазовор бўлган, РМА 2007 тақдирлаш маросимида «Энг яхши қўшиқчи» ва «Энг яхши композиция» номинацияларидан ўрин олган. 2013 йилда у жазз жанрида ёзилган альбомини тақдим қилган.

Шундан кейин бир неча қўшиқ куйлаган Терлеева аввалгидек машҳурликка эриша олмаган.

PSY

2012 йилда PSY томонидан куйланган Gangnam Style қўшиғи деярли барчани рақсга туширган деса янглиш бўлмайди. Шундан кейин хонанда қисқа муддат бўлса ҳам мегаюлдуз бўлган.

PSY YouTube’да видеоси бир миллиарддан кўп кўрилган илк хонанда бўлган. PSY айни вақтда ўз мамлакатида ҳали ҳам машҳур, шу билан бирга, туризм элчиси сифатида фаолият олиб боради ва реклама роликларида суратга тушади. Унинг халқаро аренадаги машҳурлиги сўнишни бошлагани ҳамда Аделе’нинг видеоси уникидан ҳам кўпроқ кўрилганидан кейин у спиртли ичимликларга ружу қўйгани ва биргина хит муаллифи эканлиги оғирлигини тан олган. 2017 йилда «4Х2=8» альбомини тақдим қилган ва ундаги I Luv It треки бир қанча халқаро чартлардан ўрин олган. Аммо бошқа қўшиқлари Gangnam Style’чалик машҳур бўла олмаган.