Бухоро вилояти Жондор туманидаги банк филиалларидан бирининг бошқарувчисига нисбатан жиноят иши қўзғатилди. Бу ҳақда ҳуқуқ-тартибот органларидаги манба «Дарё»га маълум қилди.
Халқ банкининг Жондор тумани филиали бошқарувчиси Ф.Р. бир муддат аввал банкнинг Галаосиё филиалига раҳбарлик қилган. «R.T.» компанияси норасмий раҳбари С.Ч. (у ҳозирда 10 миллиард сўм кредит маблағини талон-торож қилгани учун 7 йил 6 ойга озодликдан маҳрум қилинган) 2019 йил май ойида ушбу филиалдан 950 миллион сўм миқдорида кредит олган.
Фуқаро С.Ч. бу пулларни ўзига тегишли «S.G.B.» ва «С.С.Б.» компаниялари ҳисоб-рақамига ўтказган ва кредитни ўзлаштириш йўли билан талон-тарож қилган. Натижада С.Ч.нинг банк олдида муддати ўтган 811 миллион 583 минг сўмлик қарздорлиги вужудга келган. Ўрганишлар давомида банк бошқарувчиси фуқаро С.Ч.га унинг 180 миллион сўмлик кўчмас мулкларидан бирини тақиқдан чиқаришга ҳамда кредит маблағини ноқонуний нақдлаштиришга ёрдам бергани аниқланган.
Ҳуқуқ-тартибот органларидаги манбанинг «Дарё»га билдиришича, ҳозирда «уларга нисбатан Жиноят Кодексининг 167-моддаси (ўзлаштириш ёки растрата йўли билан талон-торож қилиш) 3-қисми «а» банди билан жиноят иши қўзғатилган, дастлабки тергов ҳаракатлари олиб борилмоқда.
Изоҳ (0)