Ўзбекистоннинг баъзи туманлари раҳбарлари саноатни ривожлантиришдаги яхши натижалари учун пул мукофоти олди

Вазирлар Маҳкамасининг 17 сентябрдаги фармойиши билан 2020 йилнинг биринчи ярим йиллигида саноат маҳсулотлари ишлаб чиқаришнинг ўсиш суръатларини таъминлагани учун бир қатор туман ҳокимлари ҳамда уларнинг молия-иқтисодиёт ва камбағалликни қисқартириш масалалари бўйича биринчи ўринбосарлари бир марталик пул мукофоти билан рағбатлантирилди. Бу ҳақда ЎзА хабар берди.

Раҳбарлари мукофотланган туманлар қаторидан қуйидагилар ўрин олган:

• Андижон вилоятининг Избоскан ва Қўрғонтепа туманлари;
• Бухоро вилоятининг Ромитан тумани;
• Наманган вилоятининг Норин тумани;
• Сурхондарё вилоятинннг Музработ ва Қумқўрғон туманлари;
• Хоразм вилоятининг Янгибозор тумани.

Ушбу туманлар ҳокимлари 10 миллион сўм миқдорида, уларнинг биринчи ўринбосарлари 8 миллион сўм миқдорида пул мукофоти оладиган бўлди. Мазкур рағбатлантириш Вазирлар Маҳкамасининг захира жамғармаси маблағлари ҳисобидан амалга оширилади.

Шунингдек, мазкур фармойиш билан 2020 йилнинг биринчи ярим йиллигида саноат маҳсулотлари ишлаб чиқариш ҳажмининг ўтган йилга нисбатан ўсиш суръатлари таъминланмаганлиги учун айрим туманлар ҳокимлари огоҳлантирилди, уларнинг молия-иқтисодиёт ва камбағалликни қисқартириш масалалари бўйича биринчи ўринбосарларига эса ҳайфсан берилди.

Раҳбарлари огоҳлантирилган ва ҳайфсан олган туманлар қаторига қуйидагилар кирган:

• Бухоро вилоятининг Бухоро ва Жондор туманлари;
• Наманган вилоятининг Янгиқўрғон тумани;
• Қашқадарё вилоятининг Қарши тумани;
• Самарқанд вилоятининг Булунғур, Самарқанд ва Жомбой туманлари;
• Тошкент вилоятининг Чиноз ва Ўрта Чирчиқ туманлари;
• Фарғона вилоятининг Данғара, Риштон ва Ёзёвон туманлари.

2020 йилнинг январь–сентябрь ойлари якунларига кўра, саноат маҳсулотлари ишлаб чиқариш кўрсаткичлари асосида юқоридаги рўйхатда қайд этилган туман ҳокимлари ҳамда уларнинг молия-иқтисодиёт ва камбағалликни қисқартириш масалалари бўйича биринчи ўринбосарлари фаолиятига баҳо бериш ёки эгаллаб турган лавозимидан озод этишгача бўлган жазо чоралари қўлланиши белгиланди.