Шимолий Кореяда аёллар автомактабларга қабул қилинмоқда. Ким Чен Ин ҳокимиятга келгунига қадар уларга фақат йўл ҳаракатини тартибга солиш рухсат этилган, машина ҳайдаш эса тақиқланганди. Бу ҳақда Daily NК хабар берди.
Ҳозирда айрим автомактаблар Социалистик аёллар иттифоқи тавсияси асосида аёлларни ўқитишни бошлаган. Ҳайдовчилик гувоҳномасига эга бўлиш учун навбат 18 ойгача чўзилиши мумкин. Расмий баёнот берилмаган бўлса-да, бу ҳолат Ким Чен Ин давридаги эҳтиёткор ижтимоий-сиёсий очиқлик сифатида баҳоланмоқда.
Йўл ҳаракати қоидаларининг юмшатилиши ҳақида илк ишоралар давлат матбуотида ҳам пайдо бўлган. Масалан, 2021 йилда КХДРнинг “Нодон синмун” партия газетасида отасининг изидан бориб, юк машинаси ҳайдовчиси бўлишни ўрганган ёш аёл ҳақида мақола эълон қилинган.
2012 йилда ҳокимиятга келган Ким Чен Ин аллақачон велосипед ҳаракатини либераллаштиришни маъқуллаган эди. Унинг отаси Ким Чен Ир 1996 йилда аёлларга велосипед минишни тақиқлаган, бунга амалдорнинг қизига оид фожиали ҳодиса ва “ҳилпираган этаклар орқали эътибор жалб қилиниши” хавотири сабаб бўлган. Ўша даврда аёлларга шим кийишга ҳам рухсат берилмаган.
Ҳозирги кунда Пхеньянда аёллар велосипедда юриши одатий ҳолга айланган. Қишлоқларда эса у ягона транспорт воситаси сифатида хизмат қилмоқда. Шим кийиш тақиқи ҳам бекор қилинган, ҳатто Ким Чен Иннинг рафиқаси Ли Сол Жу ҳам баъзида шим кийган ҳолда жамоат олдида кўриниш беради.
Изоҳ (0)