Республика махсус комиссияси ва Коронавирусга қарши кураш штаби аъзоси Нурмат Отабеков санитайзер-диспенсерлар нима эканлиги ва қандай мақсадларда фойдаланилиши борасидаги саволга аниқлик киритиб ўтди.
Санитайзер-диспенсерлар ҳақида сиз ва биз маълумотга эгамиз. Негадир кейинги пайтларда баъзи бир ахборот воситаларида бунга бошқачароқ, яъни санитайзер-диспансер, деган ном билан қараляпти. Санитайзер-диспенсерлар қўлларни зарарсизлантириш учун мўлжалланган мослама, унинг ичида дезинфексион воситалар, геллар, спиртли эритмалар, эфир мойлари бўлиши мумкин. У алоҳида мослама бўлиб, қўлни унинг махсус жойига қўйганда у ердаги сенсорлар бу ҳақда ахборот беради ва катта босим остида қўлга дезинфексион воситалар сепилади. Бу жуда катта оламшумул бир янгилик эмас. Фақат биз ишлатиб келаётган санитайзерларни автоматлашган, сенсорли воситаси. Шу билан биргаликда, ЖССТ санитайзер-диспенсерларни муомалага киритиш тўғрисида тавсияларини эълон қилди.Маълумот учун, санитайзер-диспенсер қўлларни зарарсизлантириш учун ишлатиладиган антисептик-дезинфекция воситаси бўлиб, қўл ювиш учун совун ва сув бўлмайдиган жойларда элементар қўл гигиенасига риоя этиш учун мўлжалланган мослама.Демак, бу каби мосламалар у ёки бу биноларнинг кириш жойларида ўрнатиладиган бўлса, ЖССТ тавсиясига кўра, бир пайтнинг ўзида ўша жойларда дока ниқобларни ҳам тарқатиш ҳамда масофадан ҳароратни ўлчаш тизими ҳам бўлиши керак. Баъзи бир санитайзер-диспенсерлар таркибида бу каби мосламалар ўрнатилган бўлиши мумкин. Бундай мукаммал мосламалар жаҳон тажрибасида ҳам қўлланилади.
Нурмат Отабеков, Республика махсус комиссияси ва Коронавирусга қарши кураш штаби аъзоси
Эслатиб ўтамиз, коронавирусга қарши кураш бўйича Республика махсус комиссияси қарори билан бинолар ва бошқа объектларга киришда дезинфекция туннелларидан фойдаланиш тақиқланган, бинолар кириш қисмида ташкил қилиш учун қулай жойда тери учун антисептик эритмалари бўлган санитайзер-диспансер қурилмалари ўрнатиш амалиёти жорий этилиши,улар бўйича масъулият ва жавобгарлик муассаса ва ташкилотларнинг биринчи раҳбарлари зиммасида бўлиши айтилган.
Аввалроқ 6 сентябрь куни Соғлиқни сақлаш вазирлиги матбуот хизмати дезинфекция туннеллари коронавирусга қарши курашда энг фойдасиз чора эканлиги ҳақида хабар берган эди. Вазирлик Республика ихтисослаштирилган аллергология илмий-амалий тиббиёт маркази директори, профессор Илмира Розиқованинг сўзларига таяниб, дезинфекция туннелларини метро ёки бошқа муассаса бинолари олдида ўрнатиш шарт эмаслиги ҳақида ёзган. Орадан бир кун ўтиб ССВ вакили дезинфекция туннелларидан фойдаланишда давом этиш кераклигини таъкидлаганди.
Июль ойи бошларида эса Германиянинг етакчи вирусологларидан бири, Бонн университети Вирусология ва ОИВни тадқиқ қилиш институти директори, профессор Ҳендрик Штрик дезинфекциялаш учун мўлжалланган туннеллар COVID-19 коронавирус инфекциясидан ҳимоя қила олмаслиги, аммо улар ротавирус ва бошқа контактли инфекциялардан ҳимоя қилишини айтганди.
Изоҳ (0)