Коронавирусга қарши курашда ёрдам бериш учун 40 нафарга яқин россиялик шифокор 1 ой давомида Ўзбекистонда бўлганди. ССВнинг хабар беришича, шу мақсадда Россиядан яна бир гуруҳ тиббиёт ходимлари келмоқда.
Ушбу гуруҳ 35 нафар тиббиёт ходимидан иборат бўлиб, Россиянинг энг нуфузли эпидемиолог, пульмонолог, анестезиолог-реаниматолог, инфекционист, рентгенолог, терапевт, жарроҳлар, лаборатор диагностика мутахассислари ҳамда анестезист ҳамшираларини жам қилган.
Гуруҳга тиббиёт фанлари доктори Константин Покровский раҳбарлик қилади.
Вазирлик хабарида қайд этилишича, ушбу мутахассислар 18 сентябрь куни Ўзбекистонга учиб келиши кутилмоқда. Гуруҳ аъзолари мамлакатнинг турли ҳудудларидаги тиббиёт муассасаларида бўлиб, шифокорлар билан ҳамкорликда коронавирус инфекциясига қарши курашади.
Эслатиб ўтамиз, Ўзбекистонга шу вақтгача коронавирусга қарши курашда ёрдам беришда россиялик шифокорлардан ташқари кореялик профессор — эпидемиолог Сой ЧжэУк, яна бир кореялик анестезиолог-реаниматолог, 15 нафар хитойлик шифокор ва тиббиёт мутахассисидан иборат гуруҳ, бир қанча туркиялик мутахассислар, Германиянинг етакчи тиббиёт мутахассисларидан бўлмиш профессор Вернер Бер фаолият юритган.
Изоҳ (0)