Жанубий кореялик ҳужумчи Сон Ҳён Мин фаолиятини АҚШнинг “Лос-Анжелес” клубида давом эттиришга яқин турибди. Бу ҳақда инсайдер Фабрицио Романо маълумотига таяниб, Championat нашри хабар берди.
Манбага кўра, томонлар шартнома бўйича келишувга эришган. Яқин кунларда 33 ёшли футболчининг АҚШ клуби билан расмий битим имзолаши кутилмоқда. Сон Ҳён Мин 3 август, якшанба куни “Тоттенҳэм” сафидаги сўнгги учрашувини “Ньюкасл”га қарши ўтказган ва шундан сўнг “шпорлар” лагерига қайтмаган. Айни пайтда у АҚШ клубидан расмий ҳужжатларни кутмоқда.
Эслатиб ўтамиз, Сон яқинда “Тоттенҳэм”ни тарк этишини расман эълон қилган эди. У 2015 йилда Германиянинг “Байер” клубидан 30 миллион евро эвазига Лондон клубига қўшилган. Ўтган давр мобайнида у “шпорлар” сафида жами 454 ўйинда майдонга тушиб, ўз ҳисобига 173 та гол ва 101 та голли узатма ёздириб қўйган. У сўнгги мавсум жамоа билан Европа Лигаси ғолиблигини қўлга киритди.
Изоҳ (0)