Бир финжон қаҳва қандай қилиб қандли диабетни келтириб чиқариши мумкин ҳамда кимлар ушбу ичимликдан тийилгани маъқул?

Кишиларни тетиклаштириши, ўзини яхши ҳис қилишга ёрдам бериши билан маълум бўлган қаҳва саломатликка ҳам таъсир қилмай қолмайди. Мутахассислар бугунга қадар унинг зарарли ёки фойдали экани ҳақида бир тўхтамга келмаган. Лекин шуниси аниқки, юрак фаолияти учун аҳамиятли бўлган қаҳвани саломатлигида муаммолари бор ёки қандли диабетга чалинган одамлар томонидан истеъмол қилиниши турли салбий оқибатларга олиб келиши мумкин.

Кофеин кимга қандай таъсир этади?

Агар саломатлигингиз жойида бўлса, қондаги глюкоза миқдори меъёридан ошмаган бўлса, меъдаости безидан инсулин етарли миқдорда ишлаб чиқарилаётган ва ҳужайралар бунга реакция бермаётган бўлса, унда қаҳва сизга ёмон таъсир қилмайди. Аммо сизда метаболизм синдроми ёки иккинчи турдаги қандли диабет касаллиги бўлса, унда мазкур тетиклаштирувчи ичимлик саломатлигингиз учун зарарли бўлиши мумкин.

Гап шундаки соғлом ва қандли диабетга чалинган одам ҳужайралари кофеинга нисбатан турлича жавоб қайтаради. Ўтказилган тадқиқотларда кофеин, қандли диабетга чалинганлар қонида қанд миқдорини сезиларли даражада ошириб юбориши аниқланган. Иштирокчиларнинг кунига 2 мартадан 250 мг кофеин истеъмол қилганидан кейин қондаги қанд миқдори 8 фоизга кўпайган.

Инсулин — организмда углевод алмашиниш жараёнини назорат қилувчи ошқозон ости бези гормони ҳисобланади. Кофеин ҳужайраларнинг инсулинга бўлган сезувчанлигини сусайтиради ва бунинг оқибатида ширинлик ёки таркибида шакар бор маҳсулот истеъмол қилинганидан кейин организмга кирган шакар керакли даражада сингмайди. Бунда организм қайта ва қайта инсулин ишлаб чиқаришига тўғри келади. Қандли диабет касаллиги бор одамлар организми инсулинга салбий жавоб беради ва таом истеъмол қилинганидан кейин қондаги қанд миқдори меъёридан ошиши кузатилади. Бу вақтда ичилган бир финжон қаҳва ҳужайралар сезувчанлигини янада камайтиради.

Бу қондаги қанд миқдорининг ошиши, қандли диабет касаллиги бор беморларнинг эса асаб ва юрак касалликлари билан боғлиқ муаммолар хавфини ошириши мумкин.

Бунинг сабаби нимада?

Кофеиннинг бундай таъсир қилиши сабаби нимада экани билан боғлиқ аниқ сабаб йўқ бўлишига қарамай, турли қарашлар мавжуд. Кофеин, организм ишлаб чиқарган инсулин миқдорини назорат қиладиган аденозинни блокловчи адреналин кўпайишига сабаб бўлиши мумкин. Кофеин блоклаганидан кейин аденозин ўз ишини бажара олмайди бу эса қондаги қанд миқдорининг ошишига олиб келади.