Яккасарой тумани Чўпонота кўчасидан, Сергели тумани Қипчоқ кўчасигача бўлган йўлда тирбандликларнинг олдини олиш учун учта янги кўприк ва йўл ўтказгичлар қурилиши ҳақида хабар берган эдик. Умумий масофаси 6 километр бўлган йўл ўтказгич ва кўприкнинг қиймати 280 миллиард сўмдан ортиқ бюджет маблағларини ташкил қилмоқда. Бу йўл ўтказгич ва кўприкда бир соатда 6 мингдан 8 минггача автомобиль ҳаракатланиши мумкин. Айни пайтда Яккасарой туманининг «Қушбеги» маҳалласида ишлар бошлаб юборилган.
«Бу қурилаётган иншоот мажмуаси пойтахт марказидан Сергелига ва Яккасарой туманидан марказга бўлган автомобиль қатновини максимал даражада тезкор, қулай ва хавфсиз бўлишини таъминлайди. Кўприкда учтадан олти полосали автомобиль қатновига шароит яратилмоқда. Қурилиш кичик ҳалқа автомобиль йўлида, Хонобод атрофидаги Қипчоқ кўчасида ва Чўпонота кўчасининг давоми бўлган Шота Руставели кўчаларида кўприк ва туннел қуриш билан бошланади. Кўприкнинг баландлиги 7,5 метрдан 13 метргача бўлади», — дейди лойиҳа раҳбари Тимур Самутдинов.
Ушбу қурилиш лойиҳаси Туркиянинг «Калян Уластирма» транспорт муҳандислик компанияси томонидан ишлаб чиқилган бўлиб, менежер Такин Екернинг айтишича, Ўзбекистонда илгари қурилган кўприкларнинг максимал кенглиги 33 метр бўлган. Бу кўприкнинг кенглиги 45 метрни, қалинлиги 1 метрдан 2 метргача бўлган дунёдаги энг ингичка кўприклардан ҳисобланади. Устунларнинг пойдевори 10-15 метр чуқурликка қуйилади. Кўприкни қуриш учун юқори бардошли Европа пўлати ишлатилади ва устунлар учун плиталар Италиядан келтирилади. Кўприк узунлиги – 597 метр, ўтиш йўллари билан ҳисоблаганда 950 метрни ташкил қилади. Кўприк 47 та таянч устунга эга бўлиб, уларнинг баландлиги кўприкнинг баъзи қисмларида 13 метргача етади. Режага кўра, йўл ўтказгич 2021 йилнинг кузида очилиши кўзда тутилган.
Изоҳ (0)