Ўзбекистон ОТМларига кириш имтиҳонларида 90 нафар абитуриент тана ҳарорати юқорилиги сабабли тест синовларига киритилмади

Ўзбекистон олий таълим муассасаларига 2020/2021-ўқув йили учун кириш имтиҳонлари 2 сентябрдан 13 сентябргача давом этди. Рўйхатдан ўтган 1 304 194 нафар абитуриентдан 1 240 614 нафари, яъни 95,1 фоизи тест синовларида иштирок этди. Бу ҳақда 14 сентябрь куни АОКАда ўтказилган брифингда Давлат тест маркази директори ўринбосари Сардор Ражабов маълум қилди.

Маълум қилинишича, 63 580 нафар, яъни 4,9 фоиз абитуриент турли сабабларга кўра тест синовларида қатнашмаган.

Шунингдек, жами 1187 нафар абитуриент турли сабабларга кўра тест синовларидан четлатилган. Шундан 548 нафари ҳудудга киришда, 639 нафари эса тест синови жараёнида имтиҳондан четлатилган.

Маълум қилинишича, 367 нафар абитуриент телефон олиб киришга уринган, 48 нафари шпаргалка олиб кирмоқчи бўлган, 118 нафари бошқа абитуриент ўрнига киришга ҳаракат қилган, 10 нафари ҳужжат сохталаштирган. Шу сабабли улар тест синовларидан четлатилган.

Тест жараёнида 491 нафар абитуриент телефондан, 68 нафари шпаргалкадан фойдалангани, 27 нафари бошқа абитуриент ўрнига киргани маълум бўлган.

Шу билан бирга, 90 нафар абитуриентнинг тана ҳарорати юқори бўлгани учун тест синовларига киритилмаган. Улар учун 17 сентябрь куни тест синовларини ташкиллаштириш режалаштирилмоқда.