Ўзбекистон Марказий банки яқинда олтин ва кумуш тангаларни яна муомалага чиқаришни бошлайди. «Gazeta.uz»нинг хабар беришича, бу ҳақда Марказий банк раиси Мамаризо Нурмуротов 10 сентябрь куни бўлиб ўтган брифингда маълум қилди.
Унинг сўзларига кўра, айни пайтда Марказий банк янги тангалар дизайни ва мавзуси (тематикаси) билан, шунингдек, унинг нумизматик қийматини ошириш устида ишламоқда. Бундан ташқари, келажакда тангалар турли ўлчамларда бўлади.
«Шунингдек, олтин ёмбиларини сотувга чиқариш ишлари олиб борилмоқда.[Аниқ санасини айта олмайман], аммо тез орада биз банклар орқали сотувни бошлаймиз», — деган Мамаризо Нурмуротов.
Банклар олтин ёмбилари сотишни бошлаши ҳақида июль ойида маълум бўлганди. Ёмбиларни ишлаб чиқариш тангалар каби Марказий банк томонидан, уларни сотиш эса тижорат банклари орқали амалга оширилади.
Ҳар бир ёмби сертификати идентификация серия рақамига эга бўлади ва ушбу рақам ёмбининг юза қисмида кўрсатилади. Қалбакилаштириш аломатлари аниқланган ҳолларда ёмбилар Давлат асиллик даражасини белгилаш палатаси томонидан ҳуқуқни муҳофаза қилувчи органларга топширилади. Ушбу ёмбилар эгаларига қайтариб берилмайди ва қайтариб сотиб олинмайди.
Ёмбилар нархлари халқаро қимматбаҳо металлар бозори конюнктураси, сўмнинг АҚШ долларига нисбатан курси, шунингдек, Марказий банкнинг маржа ва чегирмасидан келиб чиққан ҳолда ҳар куни Марказий банк бошқаруви томонидан белгиланади.
Эслатиб ўтамиз, 2018 йилнинг ноябрь ойида Марказий банк олтин ва кумуш эсдалик тангаларни сотувга чиқаришни бошлаган эди. Ўшанда 1900 дона олтин ва 6900 дона кумуш танга сотувга чиқарилган.
Изоҳ (0)