Ўзбекистонда 2020—2021 йилларда иқтисодий ўсишни тиклаш доирасида қора ва рангли металларнинг парчалари, чиқиндиларни сотиб олиш ва уларни қайта ишлаш бўйича монополия тартибини бекор қилиш режалаштирилмоқда. Бу ҳақда Вазирлар Маҳкамасининг 29 августдаги «2020—2021 йилларда иқтисодий ўсишни тиклаш ва иқтисодиёт тармоқлари ҳамда соҳаларида тизимли таркибий ислоҳотларни давом эттириш чора-тадбирлари тўғрисида»ги қарорида маълум қилинган.
Қарор билан тасдиқланган «Ўзбекистон Республикасида иқтисодий ўсишни тиклаш ва тизимли таркибий ўзгаришларни давом эттириш бўйича 2020-2021 йиллардаги амалий ҳаракатлар режаси»га кўра, минерал хом ашё базасини ривожлантириш ва қайта тиклаш давлат дастурлари доирасида фойдали қазилмаларнинг янги истиқболли майдонларини қидириш улушини 2020 йилда 35 фоизга ошириш режалаштирилмоқда.
Истиқболли майдонларни қидиришни 2021 йилда 40 фоизга етказиш, кварс қуми, доломит, пардозбоп тошлар, базалт, графит каби бозорбоп норуда қазилмаларни излаш улушини кескин ошириш, геологик ҳисоботларни рақамли форматга ўтказиш ҳамда жаҳон талабларига мос электрон маълумотлар базасини яратиш кўзланган.
Тадбиркорлик субъектларининг кичик қуюв цехларини яратиш лойиҳаларини амалга оширишдаги иштирокини чеклайдиган қора ва рангли металларнинг парчалари, чиқиндиларни сотиб олиш ва уларни қайта ишлаш бўйича монополия тартибини бекор қилиш ҳам режалаштирилмоқда.
Металлургия ва геология саноатида кон-транспорт комплексини бошқаришнинг автоматлаштирилган тизимини жорий этиш орқали «Ёшлик-I» конини ўзлаштириш инвестиция лойиҳасини амалга оширишни жадаллаштириш кўзда тутилган. Шунингдек, қимматли компонентларни ажратиб олиб товар маҳсулотига айлантириш имконини берувчи, бирламчи ишлаб чиқариш ва бойитишда, шунингдек, иккиламчи техноген хом ашёдан йўлдош металларни ажратиб олувчи янги технологияларини ишлаб чиқариш режага киритилган.
Тасдиқланган режага асосан камёб элементлар, волфрам, молибден, қалай, никел каби, шу жумладан, кам тоннали минерал хом ашё конларида тадқиқот ишларини олиб бориш, комплекс қайта ишлаш бўйича янги технологияларини ишлаб чиқиш ва ушбу металларни ишлаб чиқариш бўйича янги лойиҳаларни ташкил этиш кўзда тутилган. Шунингдек, кукунли металлар ва рангли металларни қайта ишлаш, зангламайдиган пўлатдан ясалган буюмлар ва ундан навли прокат ишлаб чиқариш учун устувор технологияларни ишлаб чиқариш режалаштирилмоқда.
Пласт сувлар, минераллашган сув каби минерал гидроресурсларни саноат ишлаб чиқаришга жалб этиш учун камёб металлардан тузларни ажратиб олиш бўйича ихтисослашган ишлаб чиқариш яратилади. Рангли металларга асосланган ҳолда юқори даражада ишлов берилган маҳсулотлар улуши ички бозордаги талабнинг умумий ҳажмидан келиб чиқиб оширилади, янги ишлаб чиқариш объектларини ташкил этиш ва мавжудларини модернизация қилиш учун давлат-хусусий шерикчилик механизмидан фойдаланган ҳолда янги объектлар қурилиши молиялаштирилади
Эслатиб ўтамиз, «Ўзбекистон Республикасида иқтисодий ўсишни тиклаш ва тизимли таркибий ўзгаришларни давом эттириш бўйича 2020-2021 йиллардаги амалий ҳаракатлар режаси»га кўра, Ўзбекистонда цемент ва ойна монопол маҳсулот тури қаторидан чиқариш, импорт қилинаётган тайёр электротехника маҳсулотларига утилизация йиғими жорий этиш режалаштирилмоқда.
Изоҳ (0)