Исроил қурилиш вазири Яаков Лицман Рош ҳа-Шана байрами вақтида қаттиқ карантин чоралари жорий этилаётганига норозилик билдириб, истеъфога чиқиш бўйича ариза берди, деб ёзади «Korrespondent.net».
Шунингдек, қаттиқ карантин чораларини қайтариш таклифини таълим вазири Изахара Шай ҳам танқид қилган. Унинг фикрича, оммавий йиғилишлар ва кўнгилочар тадбирларнинг ўтказилмаслигини таъминлаш учун комендантлик соатининг ўзи етарли.
Бундан ташқари, ҳамкасбларини мамлакат молия вазири Исраэль Кац ҳам қўллаб-қувватлаган. Унинг маълум қилишича, «умумий карантин бўйича таклифда иқтисодий жиҳатлар инобатга олинмаган» ва қаттиқ карантин кучга киришидан олдин қўшимча ҳукумат йиғилишини ўтказишга чақирган.
Аввалроқ Исроил ҳукумати мамлакатда коронавирус тарқалишининг олдини олиш учун карантин чекловларини қайтариш бўйича қарор қабул қилгани тўғрисида хабар берилганди. Чекловлар 18 сентябрь куни нишонланадиган Рош ҳа-Шана байрами — яҳудийлар Янги йили кунидан бошланади ва Суккот байрамининг охирига қадар давом этади.
Исроилда коронавирус тарқалиши тезлашаётгани ҳақида июнь ойида хабар қилинган. Унга қадар мамлакат босқичма-босқич очилаётганди, расмийлар ва шифокорлар эпидемияни тез енгди деб ҳисобланаётганди. Исроил ҳукумати 25 июнь куни хорижликларнинг мамлакатга киришига қўйилган тақиқни 1 августгача чўзишга қарор қилган. Июль бошларида эса Исроил бош вазири мамлакатдаги эпидемиологик вазиятни «фавқулодда ҳолат» деб атаганди.
Сўнгги маълумотларга кўра, Исроилда коронавирус билан касалланганлар сони 155 604 кишига етган. Ҳозирга қадар 114 998 киши соғайган бўлса, 1119 бемор COVID-19 қурбонига айланган.
Изоҳ (0)