Исроил ҳукумати мамлакатда коронавирус тарқалишининг олдини олиш учун карантин чекловларини қайтариш бўйича қарор қабул қилди. Бу ҳақда Исроил бош вазири Беньямин Нетаньяхуга таяниб, Kan нашри хабар берди.
Нетаньяхунинг маълум қилишича, вақтинчалик изоляция камида уч ҳафта давом этади. Чекловлар 18 сентябрь куни нишонланадиган Рош ҳа-Шана байрами — яҳудийлар Янги йили кунидан бошланади ва Суккот байрамининг охирига қадар давом этади. Бу 2—9 октябрга тўғри келади.
«Карантин уч ҳафтадан ортиқ давом этиш эҳтимоли бор», — дейди Нетаньяху.
Карантин вақтида мамлакат аҳолисининг аксарияти уйидан 500 метр узоқлашмаслиги керак бўлади. 18 сентябрдан мактаблар, ресторанлар, меҳмонхона, тренажёр заллари ва бассейнлар ёпилади. Бироқ аҳолига индивидуал спорт турлари билан шуғулланишга рухсат этилади. Ибодатлар чекланади.
Исроилда коронавирус тарқалиши тезлашаётгани ҳақида июнь ойида хабар қилинган. Унга қадар мамлакат босқичма-босқич очилаётганди, расмийлар ва шифокорлар эпидемияни тез енгди деб ҳисобланаётганди. Исроил ҳукумати 25 июнь куни хорижликларнинг мамлакатга киришига қўйилган тақиқни 1 августгача чўзишга қарор қилган. Июль бошларида эса Исроил бош вазири мамлакатдаги эпидемиологик вазиятни «фавқулодда ҳолат» деб атаганди.
Сўнгги маълумотларга кўра, Исроилда коронавирус билан касалланганлар сони 155 604 кишига етган. Ҳозирга қадар 114 998 киши соғайган бўлса, 1119 бемор COVID-19 қурбонига айланган.
Аввалроқ Арманистонда коронавирус сабабли 2021 йилнинг 11 январигача карантин эълон қилингани, Киевда коронавирус билан касалланиш бўйича суткалик рекорд янгилангани сабаб шаҳарда карантин чекловлари қайтарилаётгани тўғрисида хабар берилганди.
Мавзуга доир: БАА янги карантин жорий этмайдиган бўлди
Изоҳ (0)