Афғонистоннинг Қундуз ва Каписа вилоятларида жангарилар ҳужуми оқибатида камида 10 нафар полициячи ҳалок бўлди. Бу ҳақда маҳаллий ҳокимият органларига таяниб 1ТV News хабар қилди.
Қундуз вилояти губернатори Исматулла Муродий «Толибон» гуруҳи жангарилари хавфсизлик назорат-ўтказиш пунктига ҳужум уюштирганини маълум қилди. Ҳужум оқибатида 5 нафар полициячи ҳалок бўлган, яна тўрт нафар ҳуқуқ-тартибот ходими яраланган. Қарши ҳужум вақтида 10 нафар жангари ўлдирилган, олти нафари эса жароҳатлангани айтилмоқда.
Каписа вилоятидаги ҳужумда ҳам беш нафар полициячи, хусусан, маҳаллий жиноят қидирув бошқармасининг бошлиғи ҳалок бўлган, етти киши турли даражадаги жароҳатлар олган.
Муродийнинг сўзларига кўра, Қундузда Имом-Соҳиб туманидаги махсус операцияда Афғонистон қуролли кучлари «Толибон» ҳаракатининг уч нафар аъзоси ўлдирилган, икки нафар жангари яраланган.
12 сентябрда Қатарда АҚШ билан ҳамкорликда Афғонистон ҳукумати ҳамда «Толибон» ўртасида 20 йил ичида илк бор вазиятни тинчлик йўли билан ҳал этишга қаратилган музокаралар бошланганди. Музокаралар бошида икки гуруҳ аъзолари муҳокамалар оғир ва қийин ўтишини билдирган.
Афғонистон собиқ бош вазири Абдулла Абдулла Кобулдаги тинчлик жараёни учун масъул ва у икки томон ўртасидаги низони бас қилишга чақирган. Амалдорнинг сўзларига кўра, 2020 йил февраль охирларидан бери мамлакатда кузатилган тўқнашувларда 12 минг нафар тинч аҳоли ҳалок бўлган, яна 15 минг киши турли жароҳат олган.
Бироқ «Толибон» сиёсий офиси раҳбари Абдул Ғани Бародар Абдулла Абдулланинг ушбу чорловини жавобсиз қолдирган ва ўз нутқи давомида тинчлик сулҳини эслаб ҳам ўтмаган.
Аввал Ўзбекистон ҳукуматининг Доҳада Афғонистон ҳукумати ва «Толибон» ҳаракати ўртасида инклюзив музокаралар бошланганини олқишлагани хабар қилинганди.
Ўзбекистон ТИВ Ўзбекистон—АҚШ—Афғонистон уч томонлама ҳамкорлик механизмининг Сиёсат бўйича қуйи қўмитаси биринчи йиғилишида ҳам афғонлараро музокараларнинг бирини Самарқандда ўтказишга тайёрлигини билдирган.
Изоҳ (0)