Август ўрталарида АҚШ ғарбида бошланган ўрмон ёнғинлари оқибатида камида 28 нафар одам ҳалок бўлган. Бу ҳақда CNN телеканали ҳамда Associated Press агентлиги хабар қилди.
Калифорния штатида яшовчи аҳоли орасида 19 киши олов ичида қолиб ҳалок бўлган. Шунингдек, Орегон штатида ҳам саккиз нафар одам, жумладан, бир нафар вояга етмаган бола шу ҳафтада ўрмон ёнғинларининг қурбонига айланган.
АҚШ идоралараро ёнғин миллий маркази маълумотига кўра, 12-сентбарда мамлакат ғарбида 97 та катта ёнғин содир бўлган ва 1,9 миллион гектар майдон олов ичида қолган. Уларни ўчиришга 29 минг нафар одам сафарбар қилинган. Калифорния, Орегон, Вашингтон, Колорадо, Айдахо ва Юта штатларининг 40 та ёнғин ҳудудларида эвакуация ҳақидаги буйруқ кучга кирган.
АҚШдаги ўрмон ёнғинлари августдан буён давом этмоқда. Табиий офатга аномал иссиқлик ва чақмоқ тушиши сабаб бўлган. 17 августда Калифорниядаги «Ўлим водийси» миллий паркида олимлар томонидан Цельсий шкаласи бўйича энг юқори 54,4 даража ҳарорат қайд этилган.
Изоҳ (0)