Чехияга COVID-19 касаллигининг иккинчи тўлқини бошланди. Бу ҳақда Чехия телевидениеси эфирида республика ҳукуматининг илм-фан ва тадқиқотлар бўйича ваколатли вакили Роман Примула маълум қилди, деб хабар беради Blesk.cz порталига таяниб «РБК».
«Агар коронавирус тезроқ тарқалишда давом этса ва расмийлар чора кўрмаса, октябрь ойи охирига бориб мамлакат шифохоналари имконият чегарасидан ташқарида ишлайди. Ҳозир биз коронавируснинг тасдиқланган ҳолатлар сонининг биринчи тўлқинига нисбатан юқори ўсиш суръатини кўрмоқдамиз», – деди Примула.
Маълум қилинишича, Чехия Европада коронавирус билан касалланганлар сонининг ўсиш суръати энг юқори бўлган мамлакатлар қаторига кирди. Чехияда 12 сентябрь ҳолатига кўра, бир суткада 1541 кишида коронавирус аниқланган. Бу кўрсаткич аввалги кунга қараганда 100 фоизга кўпроқдир.
Айни пайтда Чехияда коронавирус билан касалланганлар сони 35,4 мингдан ортиқ кишини ташкил этади. Беморларнинг 453 нафари вафот этган, 21,2 мингдан ортиғи соғайган.
Аввалроқ, Австрия канцлери Себастиан Курц коронавируснинг иккинчи тўлқини бошланганини эълон қилди. Унинг сўзларига кўра, энг оғир эпидемиологик вазият Венада кузатилмоқда, бу ерда аниқланаётган касалланиш ҳолатлари мамлакатдаги барча янги ҳолатларнинг тахминан ярмини ташкил қилади.
Изоҳ (0)