Австрияда коронавирусга чалинганлар сони ортгани туфайли янги чеклов чоралари жорий этилди

Австрияда коронавирусга чалинганлар сони ортгани туфайли ниқоб тақиш лозим бўлган жамоат жойлари сони кенгайтирилди ва янги чеклов чоралари жорий этилди. Бу ҳақда 11 сентябрь куни Австрия канцлери Себастьян Курцга таяниб маҳаллий ОАВлар хабар берган.

«Вазият яна жиддий тус олмоқда. Сўнгги ҳафтада рақамлар ўсишда давом этди. Сизларни яна ҳушёрроқ бўлишга чақираман», — дея унинг сўзларидан иқтибос келтирмоқда маҳаллий нашрлар.

Унинг сўзларига кўра, энди ҳимоя ниқобларини фақат жамоат транспорти ва биринчи эҳтиёж товарлари дўконида эмас, балки барча дўконлар, шунингдек, мактабларда (лекин синф хоналарида эмас) тақиш талаб этилади.  14 сентябрь кунидан бошлаб кафе ва ресторанларда официантлар ҳам ниқоб тақишлари шарт.

Бундан ташқари, канцлернинг сўзларига кўра, тадбирлар, шу жумладан, ёпиқ хонада 50 кишидан ортиқ, очиқ жойларда эса 100 кишидан ортиқ одамлар иштирокида шахсий маросимлар ўтказиш тақиқланади.

Меҳмонлар учун ажратилган жойлар бўлган оммавий тадбирларни эса ёпиқ жойларда 1,5 минг кишигача, очиқ ҳавода 3 минг кишигача ўтказиш мумкин. Ушбу чора жорий этилгунча ёпиқ жойда 5 минг кишигача, очиқ жойда эса 10 минг кишигача тадбирлар ўтказишга рухсат берилганди.

Австрия канцлерининг таъкидлашича, коронавирус тарқалиши шу тарзда ўсиб борса, чеклов чоралари яна кучайтирилади.

Мамлакатда сўнгги суткада 580 киши коронавирусга чалингани қайд этилган, касалланганларнинг икки нафари вафот этган. Пандемия бошланганидан буён эса 31,8 мингдан ортиқ киши COVID-19’га чалинган, уларнинг 750 вирус қурбони бўлган.