Россиянинг «Вектор» давлат илмий маркази томонидан яратилган коронавирусга қарши вакцинанинг клиник синовларида иштирок этган кўнгиллиларда иккиламчи таъсирлар аниқланмади. Бу ҳақда «Роспотребнадзор» матбуот хизматига таяниб, «ТАСС» хабар берди.
«‘ЭпиВакКорона’ вакцинасининг клиник синовлари доирасида эмланган бир нечта кўнгиллининг инъекция жойидаги енгил ва қисқа муддатли (бир-икки кунлик) оғриқни ҳисобга олмаганда, ножўя таъсирлар қайд этилмаган», — дейилади хабарда.
«Роспотребнадзор»нинг маълум қилишича, вакцинада тирик вирус йўқ бўлиб, у синтезланган сунъий пептидлар ҳисобига иммунитетни шакллантиради. Идора маълумотларига кўра, мазкур дори воситаси юқори даражали хавфсиз ҳисобланади.
«ЭпиВакКорона»нинг кўнгиллилар иштирокидаги тадқиқоти 27 июль куни бошланган, 8 сентябрь куни стационардан синов иштирокчиларининг сўнгги гуруҳига жавоб берилган. Барча иштирокчиларда иммунитет шаклланган. Вакцина клиник синовларгача бўлган босқичда ҳам ўз самарадорлигини намоён этган.
Аввалроқ Россия ва Қозоғистон ўртасида «Спутник V» вакцинасини етказиб бериш тўғрисида битим имзолангани, Россияда грипп ва коронавирусга қарши ягона вакцина яратилаётгани, «Роспотребнадзор»нинг «Вектор» давлат илмий маркази томонидан ишлаб чиқилган коронавирус инфекциясига қарши иккинчи вакцинанинг клиник синовлари иккинчи босқичи якунига етказилиши билан гувоҳномага эга бўлиши мумкинлиги ҳақида хабарлар берилганди.
Мавзуга доир: Россияда COVID-19’га қарши вакцинанинг клиник синовлари якунланди. Оммавий эмлаш октябрь ойида бошланиши режалаштирилган
Изоҳ (0)