Россияда аҳолининг ярми коронавирус вакцинасини қабул қилишга қарши чиқмоқда

Россия Олий иқтисодиёт мактаби тадқиқоти 2020 йилнинг ёзида коронавирус вакциналарига қарши бўлган кишилар сони 8 фоизга ўсганини кўрсатди. Одамларнинг аксар қисми эпидемия ўйлаб топилган фитна эканини таъкидлаган. Бу ҳақда «РБК» хабар берди.

Россияликларнинг деярли ярми (45,6 фоиз) бу Россия вакцинаси ёки хорижда ишлаб чиқилган вакцина бўлишидан қатъи назар, ҳеч қачон эмланмасликни афзал кўрган. Сўровнома Олий иқтисодиёт мактабининг эксперт-таҳлил дирекцияси томонидан ўтказилган.

Вакцинадан фойдаланишни истамаётган кишиларнинг 24,6 фоизи оммавий вакцинация қилиш жараёнини кузатишга қарор қилган, улар эмлашнинг самарадорлиги ва хавфсизлигини аниқ билишни истайди. Яна 25 фоиз респондентлар эса ҳар қандай турдаги вакцинага қарши чиққан.

Ёз давомида коронавирус вакцинасига қарши россияликлар сони 8 фоизга ошган.

5 – 7 сентябрь кунлари бир нечта электрон ресурсда интернет-сўровнома ўтказилган. Унда 18 ёшдан 75 ёшгача бўлган 9 минг нафар россиялик иштирок этган.

Июнь ўрталарида ўтказилган худди шундай сўровнома билан таққослаганда коронавирус инфекциясига қарши вакцина яратилганидан кейин уни қабул қилишни истамайдиганлар сони 13,2 фоизга камайгани маълум бўлган. Овоз берувчиларнинг 18,6 фоизи бу йил эмланишни истамайди ва келаси йили бу борада бир тўхтамга келиши мумкин.

Россияда пандемия бошланганидан бери эпидемиянинг хавфлилик даражаси ошириб юборилаётгани манфаатдор шахслар томонидан ўйлаб топилган деб ҳисобловчилар сони ошиб бормоқда. Май ойида россияликларнинг 32,8 фоизи шундай фикрда эди, эндиликда ушбу кўрсаткич 43,4 фоизга етган. Сўровномада қатнашган ҳар бешинчи респондент Россияда эпидемиянинг иккинчи тўлқини давом этаётганини билдирган.

Россиянинг Узоқ Шарқ федерал округи (54,4 фоиз), Сибир (46,5 фоиз) ва Марказий федерал округларида (46,5 фоиз) одамлар шундай фикрда эканини айтган.

Тадқиқот муаллифларининг қайд этишича, Москвада коронавирусга ишонмайдиганларнинг сони минимал даражада паст (34,7 фоиз). Россия пойтахти аҳолиси коронавирус тарқалишининг иккинчи тўлқинига тайёргарлик кўрмоқда.

«Москвада ҳар учинчи фуқаро коронавирус пандемиясининг иккинчи тўлқини давом этаётганини билдирган», — дейилади тадқиқотда.

«Кўпчиликка вирус назарий жиҳатдан ахборот майдонида таҳдид қилган, лекин одамлар иқтисодий қийинчиликларга дуч келган, ўз-ўзини яккалаш тартибида эса турли чекловлар бўлган», — дейди Артамонов.

Март ойи охирида Москвада ва кейинчалик бошқа ҳудудларда карантин тартиби жорий этилган. 31 март куни коронавирус бўйича Россия тезкор штаби 73 та ҳудудда коронавирус юқтириб олганлар сони 2 минг нафардан ошганини хабар қилган. 11 майдан Россия президенти Владимир Путин қарорига кўра чекловлар босқичма-босқич бекор қилина бошлади. Ўша вақтда 85 та ҳудудда COVID-19’га чалинганлар сони 200 минг нафардан кўпроқ эди. Сентябрь бошига келиб Россиянинг бир нечта ҳудудларида турли чекловлар бекор қилинди, мамлакат бўйича коронавирус билан касалланганларнинг умумий сони 1 миллион нафардан ошиб кетган.

Артамоновнинг фикрларига Халқаро тиббиёт кластери бош директорининг маслаҳатчиси Ярослав Ашихин ҳам қўшилмоқда.

«Одамлар коронавируснинг у қадар хавфли эмаслигига баҳо бера бошлади. Бундан ташқари, олимлар чегаралар очилганидан кейин касалланишлар сони ошиб кетиши ва иккинчи тўлқин бўлиши борасида тушунтириш бера олмаяпти. Шунингдек, клиникалар беморларга тўлиб кетмаган, шу сабабли ҳам касалликка ишонмайдиганлар сони кескин ортди», — деган Ашихин.

У вазиятга тўғри баҳо бериш учун кўпроқ илмий анжуманлар ва тадқиқотлар ўтказиш лозим деб ҳисобламоқда.

«Барчага маълум ахборотлар бор. Россияда 18 минг нафардан ортиқ киши касаллик асоратлари оқибатида вафот этган, бутун дунёда COVID-19 оқибатида кузатилган ўлимлар сони эса 900 мингтадан ошиб кетди. Пандемия бутун дунёни қамраб олган. Деярли ҳар бир оилада муаммолар кузатилган, кўплаб одамлар касалликка чалиниб, ундан тузалган айни вазиятда мавжуд нарсаларга ишонмаслик абсурдга ўхшайди», — деган Россия соғлиқни сақлаш вазирлигининг юқумли касалликлар бўйича мутахассиси Владимир Чуланов.

Пандемиянинг Россиядаги иккинчи тўлқини ҳақидаРоссияликларнинг чегаралар очилиши коронавирус пандемиясининг иккинчи тўлқини бошланишига сабаб бўлиши ҳақидаги фикрлари деярли 50 га 50. 45,3 фоиз иштирокчи чегараларнинг очилиши, 45,3 фоиз одам эса фуқароларнинг курортларда ҳордиқ чиқариши ёки хорижга бориши касалланишлар сонини оширишига овоз берган. Жамоат транспорти фаолиятини бошлагани (17 фоиз), мактаб ва боғчаларнинг очилиши (15,2 фоиз) ҳам пандемияга салбий таъсир қилиши ҳақида гапирган респондентлар ҳам кўпчиликни ташкил қилади.

Сўровномада қатнашганларнинг деярли ярми яъни 47,6 фоизи давлат коронавирус пандемиясининг иккинчи тўлқини бошланадиган бўлса, чегараларни ёпиши кераклигини айтган. 26,2 фоиз респондентлар жамоат жойларини ёпиш, ҳар бешинчи иштирокчи эса (22,15) баҳордаги каби ўзни яккалаш тартибини жорий қилиш жавобини танлаган.

Респондентларнинг 45,3 фоизи баҳордаги каби тартиб жорий қилинса унга риоя этишга тайёр. 18 фоиз иштирокчилар эса ўз хоҳишига кўра мазкур тартибга бўйсунмасликни афзал кўрган, ҳар ўнинчи россиялик (9,9 фоиз) эса фақат жарима тайинланишига сабаб бўладиган қоидаларга амал қилмоқчи.

Коронавирус ва мактабМактаблар Роспотребнадзор талабларига қатъий амал қилиб келмоқда, дейилади тадқиқотда (сўровномада болалари мактабга қатнайдиган ота-оналар иштирок этган). Мактабларнинг 75 фоизида муассасага кираверишда тана ҳарорати ўлчанади, ярмидан кўпида битта синфда таълим олиш тартиби ишламоқда. Шунга қарамай, ҳар ўнинчи мактабда ўқитувчилар коронавирусга тест қилинмоқда. Иштирокчиларнинг 57,7 фоизи амалга оширилган ишлар коронавирус билан касалланиш ҳолатларининг камайишига таъсир кўрсатмаслигини билдирган.

Вакцинани яратиш ва тадқиқ қилиш ишларини молиялаштирувчи Россиянинг тўғридан-тўғри инвестициялар жамғармаси раҳбари Кирилл Дмитриев Россияда коронавирусга қарши оммавий эмлаш 2020 йил октябрь ойидан бошланишини айтган. Кейинчалик Россияда хавф гуруҳига кирувчи кишиларни коронавирусга қарши оммавий эмлаш 2020 йилнинг ноябрь—декабрь ойларида бошланиши ҳақида хабар берилди.