Бухоро вилоятининг Ғиждувон тумани Гаждумак қишлоғида яшовчи 80 ёшли онахон томорқасида кўкнори етиштиргани учун суд қилинди. Бу ҳақда «Дарё»га Жиноят ишлари бўйича Ғиждувон тумани суди судьяси Бобораҳим Очилов маълум қилди.
Маълум бўлишича, Ғиждувон туман ИИО ФМБ ходимлари томонидан «Қорадори-2020» тадбири ўтказилган. Унда 10 нафар фарзанднинг онаси, 80 ёшли фуқаро Х.Ш. томорқасида беш туп кўкнори ўсимлигини етиштираётгани аниқланган. ИИБ ходимлари томонидан ўсимлик холислар иштирокида ҳужжатлаштириб олинган.
Жиноят кодексининг 270-моддаси 1-қисми (тақиқланган экинларни етиштириш) билан айбланган аёл иши 2020 йилнинг 7 сентябрида Жиноят ишлари бўйича Ғиждувон тумани судида кўриб чиқилган. Х.Ш. судда ўз айбига иқрор бўлиб, бетоблиги туфайли кўкнорини фақат ўзи истеъмол қилиши учун етиштираётганини ва бундан оила аъзоларининг хабари бўлмаганини билдирган.
«80 ёшли судланувчи ҳақиқатан ҳам оғир бетоб эди. Айниқса, суд-тергов жараёнларида судланувчи Х.Ш. билан суҳбат анча қийин кечди. Онахоннинг айбига иқрорлиги, бир неча йилдан буён касал эканлиги, қилмишидан чин кўнгилдан пушаймонлиги, оилавий аҳволи, ёши ва соғлиғини инобатга олиб, унга нисбатан қонуний енгиллик берилди», — деди судья Очилов.
Жиноят кодексининг 270-моддаси 1-қисми билан тўғри квалификацияланган фуқаро Х.Ш. Жиноят кодексининг 70-моддаси (шахснинг ижтимоий хавфлилик хусусиятини йўқотиши муносабати билан уни жазодан озод қилиш)га асосан жавобгарликдан ҳамда жазодан озод қилинган.
Изоҳ (0)