Ўзбекистон бош давлат санитария инспектори Нурмат Отабеков коронавирусдан даволаниш давомида аввал билмаган нарсасини кашф қилгани ҳақида «Шифобахш» Telegram каналига берган интервьюсида айтиб ўтди.
«Мен олим сифатида яна бир нарсани ўзим учун кашф қилдим – ушбу касалликка чалиниш эҳтимоли чалинмаслик эҳтимолидан кўпроқ экан. Негаки саломатлигим учун доим синчков бўлганман, сергакликни йўқотмаганман, эҳтиётимни қилганман. Тўрт ой мобайнида касаллик ўчоғида (биз фаолият юритаётган бинода лабораториялар бор эди, у ерга одамлар коронавирусга намуна топширишга келиб туришди, баъзан ходимлар орасида касалликка чалинганлар аниқланди) бўлиб турган бўлсам-да, эҳтиётимни қила олдим. Лекин қаердадир озгина эътиборсизлик қилганманки, ушбу ҳолат касаллик юқишига сабаб бўлди. Шунинг учун ҳам касалликни юқтириб олиш эҳтимоли юқори эканлигини мен ўзим учун кашф қилдим деяпман», – дейди профессор.
Республика махсус комиссияси аъзо Нурмат Отабеков бу касалликка беписанд бўлмаслик кераклигини, касалликни фақат ишонч билан, ҳаракат билан енгиш мумкинлигини ўзи учун исботлаганини қўшимча қилди.
«Аслида ҳар қандай одам ушбу касалликни енгиб ўтиши мумкин. Шундай экан, фақат ҳаракат, тузалиб кетишга ишонч, тўйимли овқатланиш, кўпроқ суюқлик ичиш, сабзавот, мева ва кўкатлар истеъмол қилиш орқали организмнинг иммун тизимини мустаҳкамлаш, касалликдан тезроқ соғайиб кетишга замин яратишига ишонч ҳосил қилдим», — дейди мутахассис.
Аввалроқ Нурмат Отабеков қандай қилиб коронавирусни юқтириб олгани ва касаллик белгиларининг ҳаммаси ўзида кузатилгани ҳақида хабар берилган эди. Шунингдек, профессор қўшимча даволаш усуллари ва дори-дармонларсиз соғайганини ҳамда қандай асоратлар қолганини айтиб ўтганди.
Изоҳ (0)