Киевда коронавирус инфекцияси билан касалланиш ҳолатлари ортгани сабаб шаҳар эпидемиологик хавфнинг «сариқ» зонасига киритилди ва санитар чекловларнинг бир қисми қайтарилди. Бу ҳақда мерия матбуот хизмати хабар берди.
«Афсуски, янгиликлар таскин бермайдиган. Киев эпидемиологик хавфнинг ‘сариқ’ зонасига кирди. Буни фавқулодда вазиятлар бўйича ҳукумат комиссияси белгилади», — дейди шаҳар мери Виталий Кличко.
Шу муносабат билан 220 дан ортиқ одам иштирок этадиган оммавий тадбирлар тақиқланди; касалхоналарда режали даволаниш тўхтатилди (ҳомиладор, янги туғилган, саратон билан касалланган, ҳаёт учун хавфли касалликка чалинганлардан ташқари); Киевдаги олий таълим муассасалари ва коллежларда дарсларни 20 кишидан ошмаган гуруҳлар учун ўтказишга рухсат берилади.
Шунингдек, шаҳарда меҳмонхоналардан бошқа жойлаштириш бўйича хизмат кўрсатувчи барча ташкилотлар, ҳар бир ташриф буюрувчини камида 10 метр квадрат метр жой билан таъминлай олмайдиган фитнес-марказлар ёпилади; санатория ва соғломлаштириш лагерлари болаларни қабул қилишни тўхтатади; жамоат транспортлари учун йўловчиларни ташиш сиғими 50 фоиз этиб белгиланади.
Бундан ташқари, Кличко полицияга ҳам мурожаат қилиб, ўзини ўзи якаллаган ҳолда даволанаётган касалларнинг бир жойдан бошқа жойга кўчишини ва уларнинг жамоат жойларига бормаслигини диққат билан кузатишни сўраган.
Украина Соғлиқни сақлаш вазирлигининг 11 сентябрь куни тақдим этган ҳисоботига кўра, мамлакатда коронавирус билан касалланиш бўйича суткалик рекорд қайд этилган.
Ўтган бир сутка ичида Украинада яна 3144 кишида COVID-19 аниқланган. Мамлакатда пандемия бошланганидан буён касалликка чалинганлар сони эса 148,7 минг кишидан ошган.
Аввалроқ Грузия бош вазири мамлакатда коронавируснинг иккинчи тўлқини бошланганини эълон қилганди. Шунингдек, Туркияда ҳам касаллар сонининг ортиётгани сабаб барча ҳудудларида ниқоб тақиш мажбурий этиб белгиланди.
Изоҳ (0)