АҚШ президенти Дональд Трамп КХДР етакчиси Ким Чен Ин соғ-саломат эканлигини маълум қилди. Трамп бу ҳақда ўзининг Twitter’даги саҳифасида ёзди, деб хабар бермоқда «РБК».
«Ким Чен Ин соғ-саломат. Ҳеч қачон унга паст баҳо бериш керак эмас», — деб ёзган Трамп.
ОАВларда бир неча марта КХДР етакчисининг соғлиғи билан боғлиқ муаммолар ҳақида хабарлар чиқди. Бу хабарлар Ким Чен Иннинг омма олдида кам кўриниши билан боғлиқ.
Хусусан, апрель ойида CNN телеканали Ким Чен Иннинг аҳволи ўтказилган операциядан кейин ёмонлашгани ҳақида хабар берган. Телеканал манбаси Ким Чен Ин кўп йиллардан бери биринчи марта Шимолий Корея асосчиси Ким Ир Сеннинг 15 апрелдаги туғилган куни маросимида қатнашмаганига эътибор қаратган.
Кейинроқ Жанубий Корея разведкаси Ким Чен Ин операция қилингани ҳақидаги маълумотлар тасдиқланмаганини маълум қилган. Май ойининг охирида Ким Чен Ин уч ҳафталик танаффусдан кейин биринчи марта омма олдида чиқиш қилган.
Август ойининг охирида Жанубий Корея разведкаси Ким Чен Ин ўз ваколатларининг бир қисмини синглиси Ким Ё Чжонга топширгани ҳақида хабар берган.
Изоҳ (0)