Gruziya bosh vaziri Georgiy Gaxariya hukumat yig‘ilishida koronavirusning ikkinchi to‘lqini boshlanganini va vaziyat rasmiylar tomonidan nazorat qilinishini aytdi, deya xabar bermoqda “RIA Novosti”.
Foto: RIA Novosti
“Bugun aniqlangan 57 ta va kecha qayd etilgan 44 ta kasallanish holati mamlakatda epidemiologik vaziyat asta-sekin o‘zgarib borayotganidan dalolat beradi.
Kutilganidek ikkinchi to‘lqin boshlandi. Biz jarayon kuzda boshlanishini taxmin qilgandik va shunday bo‘ldi. Asosiysi, vahima qilishga asos yo‘q, chunki biz vaziyatni to‘liq nazorat qilamiz”, – dedi bosh vazir.
Gruziyada 10-sentabr kuni 57 kishida koronavirus aniqlanib, kunlik rekord yangilandi.
Jons Hopkins universiteti 10-sentabr soat 18:00 da bergan ma’lumotiga ko‘ra, Gruziyada koronavirusga chalinganlar soni 1830 nafarni tashkil qilmoqda. Bemorlarning 1334 nafari sog‘aygan, 18 nafari esa vafot etgan.
