Россия президенти Владимир Путин ҳамда ташқи ишлар вазири Сергей Лавров Сербия давлат раҳбари Александр Вучичдан ТИВ вакили Мария Захарованинг Facebook’даги пости учун узр сўради. Бу ҳақда «РИА Новости» хабар берган.
Захарова Сербия президентининг Дональд Трамп билан учрашуви акс этган фотосурат ёнига «Асосий инстинкт» фильмидаги кадрни жойлаштирганди.
«Президент Путин мендан ҳеч қачон кечирим сўрамаганди, Сергей Лавров ҳам. Иккала инсон ҳам Захарованинг пости сабаб бу ишни қилишди. Қизиғи, мен тарбия кўрган одам сифатида бўлган воқеани ҳеч қачон ҳеч қаерда эслатганим йўқ. Менимча, давлатлар ўртасидаги муносабатлар жуда яхши ва мен ушбу ҳодисани бўлмаган деб ҳисоблайман», — дея Вучич сўзларидан иқтибос келтирган «РИА Новости».
Россия президентининг матбуот котиби Дмитрий Песков ҳам Путиннинг бўлиб ўтган ҳодиса юзасидан узр сўраганини тасдиқлаган.
Эслатиб ўтамиз, Вучич АҚШга Косово бош вазири Авдулло Хоти билан музокаралар ўтказиш учун борганди. Мулоқот якунида иқтисодий ҳамкорлик тўғрисидаги келишув имзоланган. Сербия вакиллари учрашувларда ҳудуднинг мустақиллигини тан олиш ҳақида гап-сўзлар бўлмаганини қайд этган.
Изоҳ (0)