Жаҳон соғлиқни сақлаш ташкилоти 2023 йилга қадар компанияларнинг озиқ-овқат маҳсулотларини ишлаб чиқаришда трансёғлардан фойдаланишдан бутунлай воз кечишига эришишни режалаштирмоқда. Бу ҳақда ташкилот бош директори Тедрос Гебрейесус маълум қилди, деб хабар бермоқда «РБК».
«Бутун дунё COVID-19 пандемиясига қарши курашаётган бир пайтда биз инсон саломатлигини ҳимоя қилиш учун қўлимиздан келганича ҳаракат қилишимиз керак. Бунга юқумли бўлмаган касалликларнинг олдини олиш бўйича барча чораларни кўриш киради», — деди ташкилот раҳбари.
ЖССТ маълумотларига кўра, саноатда ишлаб чиқарилган трансёғ кислоталарини истеъмол қилиш натижасида юрак-қон томир касалликлари юзага келиб, ярим миллионга яқин одамнинг ўлимига сабаб бўлади. Шу муносабат билан ташкилот ўз ҳудудларида 2021 йил охирига қадар 3,2 миллиард одамни зарарли моддалардан ҳимоя қилишга имкон берадиган қонунлар қабул қилган 58 та мамлакатнинг қарорини маъқуллайди.
Бироқ ЖССТ 100 дан ортиқ мамлакатга озиқ-овқат маҳсулотидаги трансёғлар муаммосини ҳал қилишни бошлашни тавсия қилади. Озарбайжон, Бангладеш, Бутан, Миср, Ҳиндистон, Эрон, Мексика, Непал, Покистон, Жанубий Корея ва Эквадор фуқаролар рационидаги зарарли моддаларни камайтириш бўйича шошилинч чоралар кўриши зарур бўлган мамлакатлар қаторига кирган.
Шу билан бирга, ташкилот трансёғлардан фойдаланишни камайтириш бўйича чора-тадбирлар аҳоли жон бошига юқори даромад тўғри келадиган мамлакатлар томонидан амалга оширилганлигига аниқлик киритди. Шу пайтгача кам даромадли бирор-бир мамлакат бундай ишни бошламаган.
ЖССТ 2018 йилда REPLACE дастурини ишга туширди, унда ташкилот бутун дунёда саноат томонидан ишлаб чиқарилган трансёғларни озиқ-овқат маҳсулотларидан бутунлай чиқариб ташлашга интилади. Шу каби моддаларни маргарин ва пиширилган маҳсулотларда топиш мумкин. Корхонанинг кислоталари маҳсулотларнинг таркибига киритилади, чунки улар туфайли товарларнинг сақлаш муддати узоқроқ бўлади. ЖССТ маълумотларига кўра, трансёғлар ўрнига маҳсулотнинг таъмини, шунингдек, нархини ўзгартирмайдиган соғлом альтернативлардан фойдаланиш мумкин.
Изоҳ (0)