Самарқанд вилояти ҳокими Эркинжон Турдимов Украинанинг Ўзбекистондаги элчиси Николай Дорошенко билан учрашув ўтказди. Бу ҳақда ҳокимлик матбуот хизмати хабар берди.
Учрашувда Ўзбекистон ва Украина алоқаларининг мустаҳкамланиб бораётгани икки мамлакат минтақалари ўртасидаги савдо-иқтисодий, инвестициявий ҳамкорликнинг ривожланишига хизмат қилаётгани таъкидланган. Шунингдек, мавжуд имкониятлардан самарали фойдаланган ҳолда вилоятда IT Park ташкил этиш, соғлиқни сақлаш, қишлоқ хўжалиги маҳсулотларини қайта ишлаш, чорвачилик ва бошқа бир қатор соҳалар бўйича биргаликда амалга оширилиши мумкин бўлган лойиҳалар муҳокама этилган.
Николай Дорошенко Самарқанд билан ўзаро биродарлашган Львов вилояти раҳбари Максим Козискийнинг вилояти вакиллари, Самарқанд шаҳри ҳокимига Львовга таклиф этилган таклифномасини топширган.
Учрашувда Самарқанд ва Львов шаҳарлари ўртасида тўғридан-тўғри авиақатновларни йўлга қўйиш масаласи ҳам муҳокама этилган.
«Томонлар тез фурсатда украиналик ишлаб чиқарувчилар ва ишбилармонлар иштирокида онлайн режимда самарқандлик тадбиркорлар билан учрашув ташкил этиш ҳамда ўзаро манфаатли ҳамкорликни кенгайтиришга келишиб олдилар», — дейилади хабарда.
Эслатиб ўтамиз, шу йилнинг февраль ойида Украина Ўзбекистон билан авиақатновларнинг қайта тикланишига қизиқиш билдираётгани тўғрисида хабар берилганди. Икки мамлакат ўртасида ҳафтасига мунтазам етти марта рейслар қатнов қайта йўлга қўйилиши кутилаётганди.
2019 йилнинг октябрь ойида Тошкентдан Киевга чартер рейсларни ташкиллаштириш режаси билан чиққан Charter Flights Group компанияси Ўзбекистон ва Украина ўртасидаги авиақатновларни қайта тиклай олмаган эди.
2017 йилнинг декабрь ойида Украина билан доимий авиақатновларнинг тикланиши ҳақида хабарлар тарқалган эди. Икки мамлакат авиация идоралари делегациялари музокаралар олиб борган. Бироқ Ўзбекистоннинг Парвозлар хавфсизлигини назорат қилиш давлат инспекцияси томонлар ўртасида ҳал қилинмаган масалалар борлиги, уларнинг ҳал қилиниши билан томонлар музокараларга қайтишини маълум қилган эди.
Изоҳ (0)