Авваллари бир нафар профилактика инспектори учтагача маҳаллага масъул эди, ҳозир эса, масалан, Тошкент шаҳридаги ҳар бир маҳаллада иккитадан инспектор штат бирлиги бор. Бу ҳақда ИИВ Ҳуқуқбузарликлар профилактикаси бош бошқармаси бошлиғи, полковник Бахтиёр Бердиалиев «Дарё» мухбири Хонзодабегим Аъзамова билан суҳбатда айтиб ўтди.
«Дарё» мухбирининг: «Битта маҳаллада ўртача 5 минг аҳоли яшаса, тинчликни таъминлаш, маҳалладаги ҳуқуқбузарликларнинг олдини олиш битта профилактика инспекторининг ўзига оғирлик қилмайдими?», — деган саволига ИИВ расмийси шундай жавоб берди.
«Авваллари бир нафар профилактика инспектори учтагача маҳаллага жавоб берарди, қишлоқ жойларида эса бир ходим 5-7 минггача аҳолига хизмат қилган. Лекин ҳозир битта инспекторга бириктирилган аҳоли сони 3 мингдан ортиқ эмас. Ўзбекистон Президентининг 2020 йил февраль ойидаги фармонига мувофиқ, ҳозирда ҳар бир маҳалла камида бир нафардан профилактика инспектори билан таъминланган, Тошкентда эса иккитадан штат бирлиги бор.
Бироқ бир томондан гапингиз тўғри — маҳалланинг тинчлиги фақат профилактика инспекторининг ўзига топширилган, бунга фақат у масъул, дейиш нотўғри. Жойларда, аҳоли гавжум нуқталарда ички ишлар бўлимлари, бўлинмалари ташкил қилинган. Ушбу муассасалардаги ходимлар, терговчилар, саф бўлинмалари, умуман олганда ички ишлар органларининг барча ходимлари профилактика инспекторларига ёрдамчи сифатида ишлайди», — деди полковник.
ИИВ ҲПББ бошлиғининг қайд этишича, бош вазир Абдулла Ариповнинг топшириғига асосан намунали маҳалла идорасининг лойиҳаси ишлаб чиқилиб, келишиш учун Қурилиш вазирлигига юборилган. Янги намунадаги идора профилактика инспектори ва маҳалла раиси аҳоли мурожаатларини бирга қабул қилишига мослаштирилган бўлади.
«Ҳамма муаммолар маҳаллада тўпланиб, шу ерда ҳал бўлиши керак. Шунинг учун ҳам Ўзбекистон Президенти фармонига мувофиқ, профилактика инспекторлари маҳалла фуқаролар йиғини раисига бўйсундирилди», — дея қўшимча қилди Бахтиёр Бердиалиев.
Эслатиб ўтамиз, аввалроқ ИИВ Ҳуқуқбузарликлар профилактикаси бош бошқармаси бошлиғи, полковник Бахтиёр Бердиалиев 700 дан ортиқ профилактика инспекторлари коронавирус юқтириб олгани ҳамда январь—июль ойларида Ўзбекистондаги маҳаллаларнинг 61 фоизида бирорта жиноят содир бўлмагани ҳақида маълумот берган эди.
Изоҳ (0)