Фарғонада юк машина ҳайдовчиси 6 ёшли қизни уриб юборди. Қиз шифохонада вафот этди

Фарғонада 6 ёшли қиз юк машинаси уриб юбориш оқибатида вафот этди. Бу ҳақда ЙҲХББ матбуот хизмати хабар берди.

Воқеа 9 сентябрь куни соат 13:25 ларда, Фарғона вилояти, Олтиариқ тумани, Юксалиш МФЙ, Исломобод кўчасида жойлашган 163-уй олдида юз берган. 28 ёшли ҳайдовчи Н.Қ. «Газ-53» юк машинасини бошқариб кетаётиб йўлнинг қатнов қисмига югуриб чиққан вояга етмаган 6 ёшли қиз М.О.ни уриб юборган.

Оқибатда қиз тан жароҳати олиб, шифохонада вафот этган.

ЙТҲ юзасидан Олтиариқ тумани ИИБ ҳузуридаги Тергов бўлинмаси томонидан Жиноят кодексининг 266-моддаси 2-қисми (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.

Аввалроқ Ўзбекистонда саккиз ойда оқибати ўлим билан тугаган салкам 1000 та ЙТҲ юз бергани хабар берилган эди.