Навоий вилояти соғлиқни сақлаш бошқармаси бошлиғи Фарҳод Гафаров соғлиғи тақозоси сабабли ўз хоҳишига кўра вазифасидан озод этилди. Соғлиқни сақлаш вазирининг тегишли буйруғига асосан Зафар Расулов вилоят соғлиқни сақлаш бошқармаси бошлиғи лавозимига тайинланди.
Расулов шу кунга қадар Соғлиқни сақлаш вазирлиги даволаш-профилактика ёрдамини ташкиллаштириш бош бошқармаси бирламчи тиббий санитария ёрдами муассасаларини мувофиқлаштириш бошқармаси бошлиғи ўринбосари лавозимида фаолият кўрсатиб келаётган эди.
41 ёшли Зафар Расулов 2003 йилда Тошкент давлат тиббиёт институти (ҳозирги Тошкент тиббиёт академияси)ни тамомлаган. У Учқудуқ туман тиббиёт бирлашмаси бошлиғи, Навоий вилоят соғлиқни сақлаш бошқармаси бошлиғининг профилактика ва даволаш ишларини ташкил этиш бўйича биринчи ўринбосари лавозимларида фаолият юритган. ССВ хабарида бошқарманинг собиқ раҳбари Фарҳод Гафаровнинг соғлиғи билан боғлиқ қандай муаммолари борлиги ҳақида ахборот берилмаган.
Навоий вилоятида 2020 йил 9 сентябрь соат 23:30 ҳолатига кўра, коронавирус инфекцияси билан касалланганлар сони 512 кишини ташкил қилади. 498 нафар бемор касалликдан тузалган. ССВ статистикасига кўра, 6 нафар одам инфекция асоратлари оқибатида вафот этган. Вазирлик шу вақтга қадар ДХА Навоий вилояти бошқармаси ходими Адҳамжон Деҳқоновнинг 2020 йилнинг июль ойида коронавирус асоратлари оқибатида вафот этганини «тан олмай» келмоқда.
Изоҳ (0)