Тошкент шаҳрида 9 сентябрь куни Бектемир, Сергели, Шайхонтоҳур ҳамда Учтепа туманларида инвестиция дастури асосида таъмирланган тўртта умумтаълим мактабининг тантанали очилиш маросими бўлиб ўтди. Бу ҳақда Халқ таълими вазирлиги хабар берди.
Тадбирда Халқ таълими вазирлиги, Тошкент шаҳар халқ таълими бошқармаси, маҳаллий ҳокимлик вакиллари ўқувчи ҳамда уларнинг ота-оналари иштирок этди.
Маълум қилинишича, замон талаблари асосида мукаммал таъмирдан чиққан мазкур мактабларда 5 мингдан зиёд ўқувчининг сифатли таълим олиши учун барча шарт-шароитлар яратилган.
Мактабларда ахборот технологиялари хонаси, тўгарак хоналари, кимё, биология, физика лаборатория хоналари, ўғил ва қиз болалар учун технология хоналари, мусиқа хонаси, кутубхоналар фаолият юритади. Бундан ташқари, ўқувчиларга қулайлик яратиш мақсадида электрон кутубхона, тиббиёт ҳамда тиш шифокори хонаси, фаоллар зали, ошхона, спорт заллари мавжуд.
Қайд этилишича, мактаблар «Замонавий мактаб» дастури асосида тубдан янгича қиёфага келтирилиб, фасад қисмидан тортиб, ички, коммунал ва иссиқлик тизимларигача замонавий таъмирлаш ишлари олиб борилди ҳамда бутунлай янгича жиҳозлар билан таъминланган.
Мактабларда фан хоналаридан ташқари ўқувчиларнинг турли ҳунарларни ўрганиб чиқиши учун пазандачилик, сартарошхона, рақс тўгараги, миллий кураш каби хоналари мавжуд.
Таъмирдан чиққан мактаблар:- Бектемир туманидаги 289-сонли ихтисослашган давлат умумтаълим мактаби (1751 нафар ўқувчи);
- Сергели туманидаги 266-сонли умумтаълим мактаби (1251 нафар ўқувчи);
- Шайхонтоҳур туманидаги 40-сонли умумтаълим мактаби (1026 нафар ўқувчи);
- Учтепа туманидаги 295-сонли умумтаълим мактаби (1206 нафар ўқувчи).
Мазкур мактаблар 14 сентябрдан ўқувчиларни қабул қилади.
Изоҳ (0)