Европа Иттифоқи мамлакатлари ҳамжамият ичида ҳаракатланишни енгиллаштириш учун умумий «светофор» тизимини қабул қилиши мумкин. Бу ҳақда «РИА Новости» хабар берди.
Европа комиссияси коронавирус пандемияси шароитида иттифоқ ичида ҳаракатланиш бўйича ягона чекловлар тизимини жорий қилишни таклиф этди. Ички ишлар бўйича еврокомиссар Илва Йоханссоннинг маълум қилишича, иттифоқ мамлакатларидаги миллий қоидаларнинг хилма-хиллиги ҳаддан ташқари ортиб кетган ва улар Европа ичида эркин ҳаракатланишга тўсқинлик қилмоқда.
Европа Иттифоқи бу муаммони «светофор» тизимини жорий қилиш орқали ечишни таклиф қилмоқда. Бу тизимда мамлакатлар сўнгги 14 кунда аниқланадиган COVID-19 ҳолатларининг ҳар 100 минг кишидаги улушига қараб уч гуруҳга бўлинади.
Икки ҳафта ичида ҳар 100 минг кишига тўғри келадиган янги ҳолатлар сони 25 тани, мусбат натижали тестлар улуши эса уч фоиздан камроқни ташкил қиладиган давлатлар «яшил» мамлакатлар қаторига киритилади. «Сариқ» ҳудудлар қаторига эса янги касалланганлар сони ҳар 100 минг кишида 50 кишини, мусбат натижали тестлар улуши эса уч фоиздан ортиқни ёки аксинча, янги ҳолатлар сони 25 тадан 150 тагача бўлган ва мусбат натижали тестлар улуши 3 фоиздан паст бўлган давлатлар киради.
Янги касалланиш ҳолатлари сони 50 тадан, мусбат натижали тестлар улуши эса уч фоиздан ортиқ бўлган ёки янги касалланиш ҳолатлари сони охирги 14 кунда ҳар 100 минг кишига 150 тадан ошадиган давлатлар «қизил» ҳудудлар қаторидан ўрин олади.
Шунингдек, «кул ранг» ҳудудлар ҳам бўлади. Ҳар 100 минг кишида 250 тадан камроқ тест ўтказилган ёки тестлар ва янги ҳолатлар ҳақида етарлича маълумот бўлмаган ҳудудлар мазкур гуруҳга киритилади.
«Яшил» ёки »сариқ» ҳудудлардан келадиган сайёҳлар учун иттифоқ ҳудудига кириш ва ҳаракатланиш бўйича ҳеч қандай чеклов бўлмайди. Зарур ҳолларда иттифоқ мамлакатлари «сариқ» ҳудудлардан келаётганлар учун парвоздан олдин ёки етиб келгандан кейин COVID-19 тестини топшириш шартини қўйиши мумкин.
«Қизил» ёки «кул ранг» ҳудудлардан келадиганлар учун карантин ёки тест топшириш мажбурий бўлади. Европа иттифоқи мамлакатларига мазкур давлатлардан келадиганларга нисбатан тўғридан-тўғри тақиқ қўйишдан тийилиш тавсия қилинган.
Кузатувчиларнинг фикрича, Европа Иттифоқининг барча давлатлари ҳам бу тизимни қўллаб-қувватламайди, баъзи давлатларда мезонлар жуда қатъий ҳисобланади.
Бундан ташқари, сўнгги икки ҳафтада Европада COVID-19 билан касалланганлар сони ортди. Икки ҳафта аввал ўтган 14 кун учун ҳар 100 минг киши орасидаги касалланиш ҳолатлари сони 16 тани ташкил қилган бўлса, ҳозирги кунга келиб, бу кўрсаткич 46 тага етган.
Эслатиб ўтамиз, Европа Иттифоқида 15 июндан ички чегаралардаги чекловларни олиб ташлаш бошланганди.
Изоҳ (0)