Грузиянинг собиқ президенти, Украина Ислоҳотлар миллий кенгаши қўмитасининг раиси Михаил Саакашвили 31 октябрь куни Грузияда бўлиб ўтадиган парламент сайловида мухолифат ғалабага эришса, мамлакат бош вазири лавозимини эгаллашга розилик берди. Бу ҳақда «Интерфакс» хабар қилмоқда.
«Албатта, мен грузин халқимга инқироздан чиқишга ёрдам бермоқчиман. Шунинг учун тўлиқ бўлмаган даврга, ўтиш даври давомида мамлакат бош вазири бўлишга рози эканлигимни маълум қилдим. Ҳозирча Грузия тушиб қолган чуқур инқироздан чиқишни уддалай олмаяпмиз», — дея ёзган Саакашвили Facebook’даги саҳифасида.
Саакашвилининг қайд этишича, у Грузия бош вазири лавозимини эгаллаган тақдирда ҳам Украина Ислоҳотлар миллий қўмитаси раҳбари лавозимини бажаришда давом этади.
Грузия собиқ президентининг таъкидлашича, у икки мамлакатдан бирини танламайди. «Менинг курашим у ерда ҳам, бу ерда ҳам давом этади», — дея қайд этган сиёсатчи.
Маълум бўлишича, Грузия мухолифат партияси «Ягона миллий ҳаракат» мамлакат бош вазири лавозимига ўз етакчиси Михаил Саакашвили номзодини илгари суришга қарор қилган.
Грузияда Саакашвилига нисбатан бир нечта жиноят иши қўзғатилган ва у халқаро қидирувга берилган.
Грузия адлия вазири Тея Сулукиани журналистлар билан бўлиб ўтган суҳбатда Саакашвили мамлакатга қайтган тақдирда уни қўлга олишни ва унга қамоқхонада алоҳида камера тақдим этишни ваъда қилган.
Грузия президенти Саломе Зурабишвили август ойининг охирида республикада навбатдаги парламент сайловини 31 октябрга ўтказилишни белгилаган. Грузия Марказий сайлов комиссияси 4 сентябрь куни парламент сайловида қатнашиш истагини билдирган сиёсий партияларни рўйхатдан ўтказиш якуланганини маълум қилган. Рўйхатдан 66 та сиёсий куч ўтган.
Эслатиб ўтамиз, Украина президенти Владимир Зеленский 2020 йилнинг 7 май куни Грузиянинг собиқ президенти Михаил Саакашвилини президент қошидаги Ислоҳотлар миллий кенгаши таркибига кирувчи Ислоҳотлар ижроия қўмитаси раҳбари этиб тайинлаганди.
Изоҳ (0)