AstraZeneca инлиз-швед фармацевтика компанияси Буюк Британия ҳукумати буюртмасига кўра COVID-19’га қарши вакцинанинг 30 миллионта дозасини ишлаб чиқаришни бошлади. «Интерфакс»нинг хабар беришича, бу ҳақда мамлакат соғлиқни сақлаш вазири Мэтт Хэнкок маълум қилган.
«Биз AstraZeneca билан 30 миллион дозани сотиб олиш учун шартнома тузиб бўлдик ва улар вакцина ҳали тасдиқламасидан аввал ушбу дозани ишлаб чиқаришни бошлади», — деган Хэнкок Британиянинг LBC радиостанцияси эфирида.
Шунингдек, унинг таъкидлашича, тасдиқланиши ҳозирча аниқ бўлмаган вакцина рўйхатдан ўтказилганидан сўнг Буюк Британия уни бозорга олиб чиқишга тайёр бўлади. «Насиб қилса, бу иш шу йилиёқ амалга ошади. Лекин назаримда, кейинги йил бошларида содир бўлса керак», — дея қўшимча қилган Британия соғлиқни сақлаш вазири.
Шу билан бирга, Хэнкок Лондон бошқа халқаро ишлаб чиқарувчилардан ҳам бир қатор ҳали тасдиқланмаган вакциналарни сотиб олганини билдирган.
AstraZeneca вакцинани ишлаб чиқиш бўйича Оксфорд университети билан ҳамкорлик қилмоқда. Уларнинг вакцинаси ҳали тасдиқланмаган. Вакцина айни пайтда Буюк Британия, Бразилия ва Жанубий Африкада клиник синовлардан ўтказилмоқда. Компания вакцинани яратиш учун АҚШ ҳукуматидан бир миллиард доллардан ортиқ маблағ олган.
Аввалроқ Буюк Британия Pfizer Inc, BioNTech ҳамда Франциянинг Valneva компаниялари билан ҳозирда синов жараёнида бўлган коронавирусга қарши вакциналарни 90 миллион дозада сотиб олиш бўйча шартнома имзолагани хабар берилган эди.
Изоҳ (0)