Қонунчилик палатаси депутатлари Тошкент шаҳри таркибида Янгиҳаёт туманини ташкил этиш ҳамда Тошкент шаҳрининг Сергели, Бектемир туманлари ва Тошкент вилоятининг Зангиота, Қуйичирчиқ, Янгийўл ва Ўртачирчиқ туманлари чегараларини ўзгартириш тўғрисида қарор қабул қилди. Бу ҳақда Олий Мажлис Қонунчилик палатаси матбуот хизмати хабар берди.
Депутатлар 8 сентябрь куни бўлиб ўтган Олий Мажлис Қонунчилик палатасининг навбатдаги мажлисида Тошкент вилояти ва Тошкент шаҳрининг бир қатор туманларининг, шунингдек, Тошкент вилояти ва Тошкент шаҳрининг чегараларини ўзгартириш ҳамда Тошкент шаҳри таркибида Янгиҳаёт туманини ташкил этиш тўғрисидаги масалани кўриб чиқди.
Ўзгаришларга кўра, Тошкент шаҳри ҳудудидан 2 131,2 гектар, шу жумладан, Сергели туманидан 1 864,2 гектар ва Бектемир туманидан 267,0 гектар ҳамда Тошкент вилояти ҳудудидан 2 288,4 гектар, яъни Зангиота туманидан 492,0 гектар, Қуйи Чирчиқ туманидан 128,7 гектар, Янгийўл туманидан 264,4 гектар ва Ўрта Чирчиқ туманидан 1 403,3 гектар ер майдонлари Янгиҳаёт тумани таркибига ўтказилади.
Янгиҳаёт туманини ташкил этиш тўғрисидаги қарор Олий Мажлис Сенатига юборилган.
Эслатиб ўтамиз, Шавкат Мирзиёев 2020 йил 29 май куни Тошкент шаҳрида Янгиҳаёт туманини ташкил этиш масаласига тўхталиб ўтган, ушбу туманга Ҳаёт Иноғомовни ҳоким этиб тайинлашни таклиф қилганди.
Кейинчалик, Янгиҳаёт тумани таркибига Сергели тумани ҳудудидаги 13 та маҳалла фуқаролар йиғини ҳудудларини тўлиқ ҳамда 6 та маҳалла фуқаролар йиғинлари ҳудудининг бир қисмининг ўтказилиши ҳақида маълум қилинган эди.
Изоҳ (0)